Lovers in Pari-an

Gula 67

Mihakop karon kang Rosalinda ang dakong problema. Wala sila’y kuwarta nga ikagasto sa pagpatambal sa iyang amahan. Apan kun pasagdan lang usab nga dili matambalan ang mga bukog sa paa sa iyang amahan, mainutil kini hangtod sa hangtod. Dili na unya kini makatrabaho sa pagpanguma.

Mao nga taliwala sa iyang kalibog kun asa manghagilap og kuwarta, miusa paghukom si Rosalinda nga dad-on sa tambalanan sa siyudad si Noy Andres ang iyang amahan.

“Unya,” matud ni Nanay Pasita niya nga mabalak-on, “asa man kita’g kuwarta nga ikagasto?”

“Ako nay bahala niana, Nay,” nagkanayon si Rosalinda. “Basta ang importante mao nga madala si Tatay ngadto sa ospital sa siyudad.”

Gi-admit si Noy Andres sa Don Vicente Sotto Memorial Medical Center. Dihang napahimutang na kini, nananghid si Rosalinda sa iyang inahan nga mopauli una siya’g makadiyot ngadto sa balay sa iyang agalon. Misaad siya nga mobalik dayon. Misugot ang iyang inahan nga mao lang unay motanod sa iyang amahan. -- Sumpayan pa