Idlas ang katumanan sa gugma

Gula 62

Wala na motingog si Mike. Unya nagkatinutokay sila. Dayon gikab-ot sa ulitawo ang tuong kamot ni Lonia ug gikuptan sa tumang kamainampingon.

Naigking si Lonia sa paggunit ni Mike sa iyang kamot. Ang pagkupot sa ulitawo sa iyang kamot naghatod og kakulba sa iyang dughan. Mibati siya’g diyotay’ng kaulaw sa dihang nakabantay siya nga may fondness ang kinidlap sa tinan-awan ni Mike kaniya.

“M-Mike,” mikurog og diyotay ang tingog ni Lonia. “A-ang akong kamot...”

Gilugakan ni Mike ang paggunit sa iyang kamot. Apan nagpadayon kini sa pagtutok kaniya.

“Nasayod ka ba sa lintunganay’ng hinungdan kun nganong gidasig ko ikaw nga magpadayon sa pagpanulat?” Gikan ni Mike.

“Tungod kay dako ka’g concern sa akong career,” tubag ni Lonia.

“Usa lang kana sa mga katarongan. Apan may mas bug-at nga hinungdan kun nganong gusto kong i-pursue nimo ang imong writing career.”

“U-unsay buot mong ipasabot?”

“Dili ko buot nga mahilayo ka kanako, Lonia.Mao kana ang labing bug-at nga hinungdan kun nganong gusto kong ipadayon mo ang imong career sa panulat.”

“M-mike...”

“I love you, Lonia. I’ve never felt like this before, hangtod nga nagkaila ta ug mibati og lahi nga pinitik ang akong kasingkasing.”

“M-Mike, abi ko ba’g hinigala lang ang imong pagtagad nako? -- Sumpayan pa