Sa pagkamatngon kog buot, si Tatay Meyot na ang nailang mananambal o arbularyo sa among barangay sa Pamutan. Adunay laing mananambal sa silingang barangay apan sa akong nadunggan gikan sa among katagibarangay si Tatay ang sagad dangpanan kun dunay buot magpatambal sa ilang nagkalain-laing balatian.
“Kadto si anhing Lolo Digoy manambal ba sad to siya Tay?” sukot ko sa akong amahan usa ka gabii niana samtang nagkalingaw siya’g pakli sa Banat News.
“Wa kitay kaliwat nga mananambal, Norwin. Kining akong pagkamananambal mora og gipangayo sa kahigayonan,” tubag sa akong amahan.
“Mao ba Tay? Nganong nakaingon man kang gipangayo sa kahigayonan?” dugang kong pangutana kay nakuryoso ko sa hinungdan sa iyang pagkamananambal.
“Buyno, suginlan tika anak. Kamo ra si Nanay nimo Caring ang nasayud bahin niini.” Matud ni Tatay dungan ang pagbutang sa Banat News ibabaw sa lamesa.
“Dugay-dugay na kadtong hitaboa. Tingali hapit mobayente ka tuig ang milabay ug baga pa kayo ang kakahoyan diha sa unahan sa atong uma. Usa kadto ka buntag sayo samtang paingon ako sa atong uma, kalit lang may nabati akong kasikas ibabaw sa usa ka punoan sa kahoy. Sa paghangad nako, akong nakita ang duha ka bitin nga sama kadaku ang lawas sa akong bukton. Nag-away sila ug wa madugay nahug ang usa kanila. Wa na kini maglihok paghagba niya sa yuta samtang ang iyang kontra daling mikamang paingon sa ubos. Dali kong mipalayo og diyutay kay basin mopadung kanako apan didto siya mopaingon sa usa ka kahoy ug gipaak niini ang tungang bahin sa punoan sa kahoy. Tapos giduol ang wa na maglihok nga bitin ug gipaak niya ang dapit sa ikog niini. Wa ko kasabot kun nganong gibuhat niya kadto apan kalit milihok ang maong bitin nga gituohan kong patay na ug daling mipalayo suot sa kasagbutan.”
“Unsa may imong gibuhat Tay human ‘ato?” nako pa nga nalingaw sa gisugilon ni tatay.
“Nakahunahuna kong tambal seguro kadtong kahoy nga gipaak sa bitin kay naulian man ang iyang kontra. Nagkiskis kog panit niini ug akong gida sa balay. Gisagol nako sa lana ang kiniskis ug ikaw Norwin ang unang nasuwayan ug naayo sa taas nimong hilanat human ka nako kahaplasi sa lana.” Padayag sa akong amahan.
“Daghan na ang natabangan namo ni Nanay nimo sa atong mga silingan nga naayo sa ilang mga balatian ug mikatap ang balita hangtud sa ubang kabarangayan,” puno ni Tatay.
“Nagpadayon sa iyang pagpanambal si Tatay ug nakatabang kini sa among pag-uswag sa among pagpuyo gumikan kay daghan sa magpatambal ang mohatag og kwarta isip bayad bisan di maningil ang akong amahan.
Apan usa ka adlaw niana, may kusog nga bagyong miabot ug daghang mga kakahoyan ang nangatumba lakip na ang gikuhaan ni Tatay sa iyang tambal. Naluka gyud kini ug namatay ang maong punoan sa kahoy. Nakahukom si Tatay nga mamalhin kami’g laing dapit nga kapuy-an aron di mahibaw-an ang iyang sekreto sa panambal.
Tungod kay daku man og natigom si Tatay sa panambal, iya kining gipuhonan sa negosyo ug kalooy sa Kahitas-an milambo ang maong negosyo. Nag-buy-and sell usab si Nanay ug mibuwag ako nila sa dihang nakakita na ako’g kapikas sa akong kinabuhi. (Katapusan)