Diin kadto ta magkaila, bay? sukot ni Rudy sa tawo nga nitimbaya niya pagpatubil niya'g krudo sa Petron Gasoline Station sa Canduman. Gikan pa si Rudy nga nagpahugas sa iyang sakyanan sa Green Meadow Carwash Center. Nagpatubil sab karong hapona ang tawo og gasolina sa iyang motorsiklo atbang sa tubilanan diin giparking ni Rudy iyang Isuzu Crosswind nga puti. Pamilyar ni Rudy ang tawo. Mora'g taga-Alegria diin siya nagdako. Pag-abli ni Rudy sa toong bintana sa iyang sakyanan ganiha pag-urong niya sa tubilanan, niisa ang kamot sa tawo ug niingon "Maayong hapon diha, sir!" ug nagpahiyom. "Maayong hapon sab," ni Rudy. Ug gusto niyang masuta kun diin gyud sila magkakaila ining tawhana. "Tubili'g bali'g kinyentos pesos, Dong" ni Rudy ngadto sa gasoline boy nga niduol.
"Sorry, sir. Na-aan lang tika nga akong higala," sa tawo. Niduko kay naulaw. Ah, way kaso. Ang kuyaw kun ma-aan ko nimo nga kaaway. Mas delikado," ni Rudy nga nagpahiyom. Nanaug siya sa iyang sakyanan. Niduol sa tawo. "Ang maayo hinoon mag-ila-ila ta. Aron sunod natong kita, higala na gyud ta," ni Rudy. "Okay ra pod ko," sa tawo nga nagpahiyom. Gisirhan niya ang tangke sa motorsiklo. Human na'g tubil. Nibayad siya sa gasoline boy. "Di ba taga-Alegria man ka?'' ni Rudy. "Dili, sir. Taga-San Francisco, Camotes ko," sa tawo.
"Ako si Rudy. Rudy Gabucan. Ganahan kong makighigala nimo. Kay sa akong tan-aw, maayo kang tawo'' ni Rudy nga nitunol sa iyang kamot aron makiglamano. Gidawat sa tawo iyang kamot. Naglamano sila. "Ako si Asterio. Asterio. Asterio Mesiyas" sa tawo. "Natag-anan nako nga buotan ka. Kay dili nimo mansahan imong apelyido" ni Rudy nga nagpahiyom. "Gikalipay ko nga nakaila ka, attorney" ni Asterio. "Ah kaila na diay ka daan nako?" ni Rudy. "Nanaghap lang ko. Kay drayber man ko'g habalhabal. Unya maagian man nako imong opisina sa Upper Canduman nga naay karatula sa imong ngan," ni Asterio, nagpahiyom. "Wa lang sab ko maulaw nga makighigala nimo. Kay daghan mang nag-ingon nga dili kono ka matapobre. Nga mahigalaon kang pagkatawo. Dili seko," ni Asterio.
"Basin pag sakto na ilang obserbasyon para nako. Di man lang gyud ko modayeg sa akong kaugalingon. Wa lang koy pili'g higala. Kutob sa makighigala nako, datu o pobre, higala ko nila. Pero mas daghan ko'g amigong pobre. Kay pobre man ko'g kagikan. Unsa ba lang disgrasyaha nga naabogado ko?" ni Rudy. Nilingi siya sa gasoline boy nga nisenyas nga natubil na ang bali'g kinyentos pesos. Nikuot si Rudy sa iyang pitaka sa luyo nga bulsa sa iyang short pants. Nihatag og tibuok kinyentos pesos sa gasoline boy.
"Ang uban nakong mga higalang drayber og habalhabal, niingon gyud nako nga unsa may makuha anang pakighigala og abogado? Niingon pa gyud sila, tagdon kaha ka anang pobre man ka?" ni Asterio. "Mao nay nakasayop nga hunahuna sa tawo. Makighigala lang diay ka sa usa ka tawo kun duna kay makuha niya. Dili na pakighigala. Pahimulos!" ni Rudy nga nagkatawa. "Parking tas daplin aron magtiwas ta'g istorya" dugang ni Rudy. Kay nakaistorbo silas ubang sakyanan mopatubil. Nisakay si Rudy sa Crosswind ug si Asterio sa iyang motorsiklo. Namarking sila's kasadpang habig sa estasyonan sa gasolina.
"Ikaw, mosimba man ka? Husto pirmi diay tang mag-abut ma-Domingo sa Nativity Parish. Mao diay'ng napamilyar tika. Kanang pag-ingon sa pari, ipakita ang panag-inigsoonay. Unya moyokbo ta sa atong atubangan, tuo, wala ug loyo. Pobre'g dato atong mayokboan. Pobre'g dato atong higala o igsoon," dugang ni Rudy human sila nahilona sa parkingan. "Unya puwede ko mokonsulta nimo?'' ni Asterio, "Shoot!" ni Rudy.
Dangta'g usa ka bulan napundok ni Asterio iyang tanang mga higala nga habalhabal drayber. Naghimo sila'g kapunongan tinabangan ni Rudy. Dili na sila basta-basta nga daugdaugon sa mga mananakop sa trapik. Kay duna na silay retainer nga abogado. Sa ilang daily dues nga peso matag adlaw, dako sila'g kaayohang nahatag sa ilang kapunongan nga Nagkahiusang Habalhabal Drayber sa Canduman (NAHADCAN) nga may kinyentos ka membro. Kun sinsero lang sila, tinabangay ang makuha sa usa'g-usa. Dili pahimuslanay. (Kataposan)