Nasuko na gyud ang ungo

Nia na pud sila si Bartolo dinhi sa tindahan ni Inse Miyak. Basta bakasyon na gani kining tindahan ni inse Miyak maoy kinaham sa mga batan-on nga ilang estambayanan.

Apan dihang miabot kini si Bartolo dinhi sa balangay ug nagtukod og usa ka grupo, ingon sa wala na kaayo’y magdugay pag-estambay dinhi. Dunay daghang mainom si inse Miyak.

Dakodako kining iyang tindahan ug duna say kan-anan sa pikas bahin nga gisumpay sa iyang tindahan. Siya gihapon ang tag-iya niini. Ang bana ni inse Miyak tua sa gawas kay usa ka seaman.

May anak si inse Miyak ug kini mao si Daylina. Anak kini niya sa iyang unang bana nga matud pa gipusil didto sa ilang lungsod.

Ug matag higayon nga naa sila si Bartolo sa tindahan nila ni inse Miyak, magpadungogdungog gyud sila nga siya gusto nang maminyo ug ang iyang minyoan anaa ra kuno dinhi sa baryo.

“Kinsa man nang bayhana, Bay, mahimo ba nga imo ming sultihan kun kinsa ang maong binuhat nga maoy nakapapitik sa imong kasingkasing?” ni Julian pa usab, barkada gihapon ni Bartolo, ug maoy pangabaga ni Bartolo.

Kining ilang “Gang” ni Bartolo kanunay lang makakita’g engkuwentro. Dihay kausa nga nakasulod gyud sila’g kadiyot sa prisohan ug kay suod sa mayor si Bartolo maong wala sila magdugay’g puyo sa prisohan.

Ug karon, nia na sab sila sa tindahan ni inse Miyak ug duna karoy usa ka yawan-ong laraw si Bartolo ug kini mao ang paglugos kang Daylina.

Tuod man, dihang mingaw na ang gabii ug dihang nangatulog na sila si inse Miyak ug Daylina ila dayong gisaka ang inahan ug anak. Ug kay lima sila si Bartolo may usa lang ang gihimo nilang “Look-out” didto sa tungod sa kuwarto ni Daylina.

Gisugdan dayon nila ni Bartolo ang pagpahimulos sa lawas ni Daylina didto sa kuwarto niini. Si inse Miyak walay kalibotan didto sa iyang kuwarto kay nahinanok pag-ayo. Apan nahaatras sila dihang mikalit lang kausab ang bayhon ug hitsura ni Daylina.

“Sayod kong ako ang inyong tuyo rong gabhiona, pero, giuhaw ko’g dugo sa tawo ug tayming usab nga inyo kong gisaka dinhi sa akong kuwarto. Dali, mo, daliiiii, grrrrrrr!” Ug gipamahit ug gipangawras ni Daylina ang mga bagis. Wala sila’y bawot sa kusog sa mangtas nga ungo. “He, he, he, he si nanay Miyak. Inig mata adto niya, suyopon pud ang inyong mga dugo, wakkkk!”

“Tabanggg! Dagaaan! Managaannnn ta, mga parts, aaaaahhhh ayawwwwwww!” Nagkapulikig panagang ang mga bagis apan nangalaksi na ang ilang mga kaunoran.

Didto sa silong tungod sa bentana ni Daylina, maoy nakita ni Frank (kauban sa Gang) nga may nahulog ug matag kahulog sa ubos iyang makita nga dili na maglihok ug nakuniskunis ug nababha ang tiyan ug nanggawas ang mga tinai.

Ug ang kataposan nga nahulog gikan sa bentana ni Daylina mao si Bartolo ug mao lang gihapon ang iyang nahitabo. Nagalhab ang tiyan ug nanggawas ang iyang mga tinai. Ug maoy nakita ni Frank si inse Miyak nga didto sa bentana ni Daylina nga naabli na ug nagpahiyom kining nanambo.

“Hoy, ikaw, Frank, gusto ka nga maparehas nila?” Wala na lang magpaabot pa’g unsay itubag niya sa mga ungo, kay tulin pa sa manatad nga midagan si Frank ug pag-abot niya didto sa may dakong punoan sa akasya diha na si inse Miyak ug nagpahiyom gihapon kini ug laksot na kaayo ang nawong.

“He, he, he, he, he, tungod ninyo wala na kaayo koy suki ug mga customers sa akong tindahan. Busa, hutdon ko kamo’g patayyy! Waaaaakkk, yaaaaakkkk!” Ug midasmag si inse Miyak kang Frank. Ug gitabangan nila’g suyop ni Daylina ug inse Miyak ang dugo ni Frank kinsa nahisama na lang sa usa ka baboy nga giluglog nga nagpaninggit. (Kataposan)