Lovers in Pari-an

 Gula 59

“Ayaw kabalaka, Hija,” matud ni Atty. Gumera nga ingon sa nakaagpas sa iyang gihunahuna. “Sa gikaingon ko na, girespetohan ko ang imong mga desisyon. Dili ko magsamok sa pagpakigrelasyon mo sa maong lalaki. Gusto lang kong masayod kun kinsa siya.”

Wala gihapon motingog si Rosalinda.

“Nakaila ba ako sa maong lalaki, Hija?” Gikan na usab ni Atty. Gumera.

“O-oo, Atorni,” tubag ni Rosalinda. “N-nakaila ka kaniya.”

“Kun mao, kinsa ang maong lalaki, Hija.”

“S-si...si Bongkoy.”

Pagkadungog ni Atty. Gumera sa gisulti ni Rosalinda, mibahakhak pag-ayo ang abogado. Naglibog ug nahibulong pag-ayo si Rosalinda kun nganong ingon sa nahimuot man kini pagkasayod nga si Bongkoy mao ang iyang hinigugma.

Misatong pag-ayo ang katawa ni Atty. Pomposo Gumera. Nahimuot kini pag-ayo sa gitug-an ni Rosalinda. Si Rosalinda mibatig tumang kahibulong sa gipakitang reaksiyon sa iyang agalon sa iyang pagtug-an ngadto niini nga si Bongkoy mao ang iyang hinigugma.

“Nga-nganong mikatawa ka man, Atorni?” Sukit ni Rosalinda.

“Tungod kay dugay ka man kaayong nakatug-an kun kinsa ang imong hinigugma,” sa abogado pa. “Si Bongkoy man diay ang buot mong ipasabot.” -- Sumpayan pa