Gikan mitambong sa usa ka party ang magtiayong Danny ug Carmen. Pag-abot sa ilang balay, misud si Carmen sa ilang kwarto. "Wa na jud diri sa gibutangan nako sa mga alahas. Sus, ang kwentas, bracelet, singsing ug ariyos, giusa ra ba to nako’g putos sa gamay'ng table napkin kay adto na lang unta to nako isul-ob sa balay sa higala ni Danny nga nag-party," nakatuaw si Carmen sa iyang kaugalingon nga gipaningot sa nerbiyos sagol kaguol.
"Naunsa ka nga gadali man ka’g sud sa atong kwarto?" sukot ni Danny nga misunod sa iyang asawa.
"Ang akong alahas nga pulos white gold Dan, wa na diri sa akong gibutangan. Mobili ra ba tong tanan og trenta mil pesos." Tubag ni Carmen nga kahilakon.
"Nakabantay ko nimong nagdali ka ganina samtang nagpaingon ka sa awto nga akong giparking sa atong balay."
"Nagdali ko niadto kay apurado man sad gud ka kaayo. Nakalimot man gani sad ko’g lock sa kwarto." Pangatarungan ni Carmen.
"Oy, ang atong katabang nga si Selsa, nangutaw ra ba siya sa may sala. Siya ra ang nahibilin sa balay," matud sa bana nga may pagduda sa ilang helper.
Daling mipaingon si Danny sa nahimutangan sa katabang ug gipangutana kini bahin sa alahas nga nawagtang. Apan hugot namalibad ang katabang nga wa siya makakita sa maong mga alahas.
"Atong dad-on si Selsa sa presinto sa kapolisan aron ipa-imbestigar, Dan. Basin moangkon siya didto. Matud ni Carmen nga labihang sukoa.
Apan wa gihapon moangkon ang katabang nga siya’y nagkuha sa mga alahas. Bisan giunsa na lang sa paghudlat aron motug-an apan wa gyud kini moangkon. Wa lang nila kini palayasa kay naglaum silang motug-an ra kini sa kaulahiay.
Paglabay sa pipila ka mga adlaw, nakahukom na lang ang katabang nga mopauli na lang sa ila sa probinsya kay wa nay pagsalig kaniya ang iyang mga amo. Gitugotan kini sa magtiayon apan wa nila hatagi sa usa ka buwang sweldo.
Usa ka adlaw niana, samtang nagpalit og tambal sa usa ka botika si Carmen nga duol ra sa ilang gipuy-an may namatikdan siya sa usa sa mga sales clerks.
Oy, kanang kwentas ug bracelet nga gisul-ob sa tindera pareho man sa ako nga nawagtang?" gikulbaan siyang nagtan-aw sa mga alahas.
Gisultihan dayon ni Carmen ang iyang bana ug kay higala man ang tag-iya sa botika ilang gipasukit-sukit ang maong salesclerk. Dali sab kining miangkon nga nakit-an kuno niyang mga alahas pag-agi niya tungod sa gate sa usa ka balay nga ilaha diay sa magtiayon.
Nahinumdom si Carmen nga niadtong sayo sa gabii nga nagdali siya paingon sa awto nga nag-park duol sa ilang balay, gisud niya sa atubangang bulsa sa gisul-ob niyang jeans ang giputos nga mga alahas. Nahug diay kini nga wa niya himatikdi sa dayong sakay sa awto paingon sa party.
Igo nalang sa paghinuktok si Carmen nga nalooy naghunahuna sa ilang helper nga inosente sa hitabo. Di jud diay maayong magdali-dali sa paghukom. (Kataposan)