Lovers in Pari-an

 Gula 58

Namatikdan hinuon ni Rosalinda ang dakong respeto ni Atty. Gumera sa iyang pagka-babaye. Sukwahi sa iyang impresyon niadtong unang higayon sa pagpangulitawo niini kaniya nga nagtuo siyang ubos ra kaayo ang pagtan-aw niini sa iyang pagka babaye tungod sa iyang kakabos. Iyang nasuta karon nga matinud-anon si Atty. Gumera sa tuyo niini kaniya ug gipaagi gayod sa diplomasya ang pagpangulitawo niini kaniya. Wala kini mamugos. Giagad lang gyud niini ang iyang desisyon.

“Unsa may hinungdan nga maglisod ka sa paghukom?” Sukit ni Atty. Gumera usa ka higayon niana nga nagkasulti sila sa sala.

“M-may hinigugma na ako, Atorni,” nag-ukon-ukon siya sa pagtubag.

“Mao ba? Kinsa siya, Hija? Kinsa ang palarang lalaki nga nakaangkon sa imong gugma?”

Wala motingog si Rosalinda. Nagduhaduha siya kun tug-anan ba niya ang iyang agalon kun kinsa ang iyang hinigugma. Nabalaka siya nga tingalig masuko kini kang Bongkoy sa higayon nga masayod kini nga ang ulitawo mao ang palarang lalaki nga iyang gihigugma. -- Sumpayan pa