Lovers in Pari-an

 Gula 56

“Wa ka ba diay pagsalig nako, Bongkoy?”

“Di sa ingon niana, Ros. Nabalaka lang ko. Kun ikaw pa sa akong dapit, ingon sab tingali niini ang imong bation.”

Wala motingog si Rosalinda.

Adunahan si Atty. Gumera, Ros,” gikan na usab ni Bongkoy. “Mahimo niya ang tanan nga iyang magustohan. Maangkon niya ang mga butang nga buot niyang angkonon pinaagi sa gahom sa iyang salapi. Kinsa man kaha ko nga makig-atbang sa gugma ni Att. Gumera kanimo?”

Naluoy si Rosalinda kang Bongkoy. Iyang natugkad nga na-insecured ang iyang hinigugma.

“Wa kay angay kabalak-an, Bongkoy,” gialam-alaman ni Rosalinda ang hinigugma. “Ipasalig ko nimo nga dili ko mahaylo sa gitanyag ni Atty. Gumera kanako.”

“Mamiya na lang lagi ta niining dapita aron dili na magsamok nimo si Atty. Gumera.”

“Hunahunaon pa nako’g maayo kanang imong gisugyot.”

Naglibog si Rosalinda sa angay niyang buhaton. Gipadayag niya ang iyang suliran ngadto kang Tasing. Namasin siya nga makatabang kini kaniya.

“Nangulitawo si Atty. Gumera nimo?” Sukna ni Tasing nga daw sa dili makatuo. -- Sumpayan pa