Lovers in Pari-an

 Gula 54

Nagpabilin sa kahilom si Rosalinda. Wala siya masayod kun unsay angay niyang itubag ngadto sa iyang agalon. Sa iyang pagsabot, nangulitawo na gayod kini kaniya.

“Nasayod ko nga tungod sa kadako sa gintang sa atong pangedaron,” gikan na usab ni Atty. Gumera, “maglisod ka pagdawat sa gitanyag ko kanimo. Tingali, lisod na akong higugmaon sa usa ka batan-on nga sama kanimo. Pero sa panahon karon, kinahanglan nga praktikal ka. Kun magpakasal ka kanako, mabulahan ang imong pamilya. Ako’y mopa-eskuyla sa imong mga manghod. Patukoran ko pa usab og balay ang imong mga ginikanan.”

Wala gihapon magtingog si Rosalinda. Naghinuktok siya. Gitimbangtimbang niya’g maayo sa iyang hunahuna ang gisulti ni Atty. Gumera. Tinuod nga dakong kahigayonan ang gitanyag ni Atty. Gumera kaniya. Kun pakaslan niya kini, seguradong mahaw-as na gayod sa kalisod ang iyang mga ginikanan ug igsuon. Mabulahan silang tanan.

Apan wala siya mahigugma kang Atty. Gumera. Gawas sa dakong gintang sa ilang pangidaron, sama ra sa usa ka amahan ang iyang pag-ila ngadto niini. Si Bongkoy ang iyang gihigugma. Si Bongkoy ang gipitik sa iyang kasingkasing. -- Sumpayan pa