Lovers in Pari-an

Gula 52

“Tinuod kana, Hija,” laktod nga tubag sa lagas nga abogado.

“Nga-ngano man diay unta, Atorni?” Pakitubod ni Rosalinda.

“Pila ba kamong tanang managsuon?” Misumbalik pagpangutana ang abogado.

“Pito kaming tanan, Atorni, ug ako ang kamaguwangan.”

“Gusto ka bang maka-eskuyla sa kolehiyo ang imong mga manghod?”

“U-unta, Atorni. Pero wa may ikagasto ang akong mga ginikanan. Mao man gani nga dugay kong nakatapos sa hayiskol kay bisan sa sekundarya maglisod na sila sa paggasto. Mao kini hinungdan nga nanarbaho ko...aron makatiwas bisan sa hayiskol na lang ang akong mga manghod.”

“Niay oportunidad nga akong itanyag nimo nga kun magkasinabot kita, seguradong makatiwas sa pag-eskuyla ang imong mga manghod. Kana lagi kun makadawat ka sa ihatag kong kondisyon.”

“Unsa man diay kana, Atorni?”

“Ako’y moabaga sa galastohan sa pagtungha sa unom nimo ka manghod hangtod nga makatapos sila’g kurso sa kolehiyo. Pero ubos sa usa ka kondisyon.”

“U-unsa man ang maong kondisyon, Atorni?”

“Nga magpakasal ka kanako.”

“U-unsa?” -- Sumpayan pa