Idlas ang katumanan sa gugma

Gula 48

Ang tinuod, gikahinaman niya ang mga halok ni Rev. Bisan wala siya maglaom nga magkarelasyon sila -- tungod kay may girlfriend na kini ug sa kalainan sa ilang estado sa kinabuhi -- apan may mga higayon gayod nga mangandoy ug mangindahay siya nga matilawan ang katam-is sa mga halok ni Rev.

Wala lang siya magdahom nga mahagkan siya ni Rev sa dili tukmang panahon. Mao kini ang hinungdan nga mipakita siya’g pagsuki. Apan ang tinuod, gikalawat niya deep inside ang maong halok sa dakong kalapad sa kabubut-on.

Lawom nang gabii apan wala pa gihapon mahikatulog si Lonia. Kun piyongon niya ang iyang mga mata, molilas sa iyang handurawan ang panagway ni Rev nga nagkatawa. Padayon niyang gi-imagine ang paghalok niini kaniya.

Mitingog ang message alert tone sa iyang cellphone. Kinsa kaha ang nagtext kaniya niini dis-oras nang takna sa kagabhion? Gikab-ot niya ang iyang cellphone nga gipatong sa lamesita nga nahimutang habig sa ulohan sa iyang higdaanan ug gisusi kun kinsay nagpadala og mensahe kaniya.

Gikan ni Rev ang text. Nagkanayon kini: “D last tym my heart was broken I swore I wud not luv again. I tot 8 was over but den sumone walkd n2 my lyf. Am not sure f she’s worth loving. So I said, ok, 1 last cry.”

Gi-delete dayon ni Lonia ang maong mensahe human kini niya nabasa. Apan naghinuktok siya. May buot bang ipasabot si Rev sa pagpadala sa maong mensahe niini kaniya? O gusto lang gayod siyang sungogon niini? -- Sumpayan pa