Lord, matuman ang imong pagbuot

Nagsugwak sa daghang tawo ang sulod sa Cebu Metropolitan Cathedral. Tanang lingkoranan puno. Nagdasok sa mga nanindog ang matag daplin ug ang nagngangang baba sa simbahan. Dili bastabasta ang haya nga gimisahan karon. Gani, si Cardinal Vidal gayod ang nangulo sa pagmisa uban sa kawhaan kapin ka pari.

Buotan nga pagka tawo si Ma'am Aurora. Mahal siya sa mga estudyante. Pinangga siya sa nagkalainlaing pundok sa sosyedad, ma-gobiyerno man, o masimbahan gumikan sa iyang pagkamaayong modelo nga inahan, kinsa mahigugmaong mipasunod sa mga moral values sa kinabuhi ngadto sa iyang pamilya ug sa unibersidad nga iyang gialagaran. Sa laktod, giidolo siya sa Katilingban, kinsa nakaila kaayo sa iyang Disyonon nga mga gawi.

Siya ang matang sa linalang nga bisa’g unsao’g away sa iyang isig kaingon, dili gyod mobawos pagbuno og masakit nga mga pulong. Maminaw lang panahon sa kainit ug anha na mobubo sa iyang kabugnaw inig kaawop na sa dilaab. Labayon man siya’g bato. Pan ang iyang ibalos.

Oo, soft spoken si Ma'am. Simple lang, pero intelehente. Gaan ang iyang mga pulong pero molanay sa mga kasingkasing nga puthaw.

Ako nga usa ka visionary gifted Sister, naintriga sa iyang pagkalimpyo, nagtuo nga deretso siya sa Langit. Mao nga ania gayod ako lingkod atubangan sa altar duol sa iyang lungon, namasin nga may mga tilimad-ong hitabo nga makatug-an nako asa siya ibutang sa Ginoo.

Tuod man, pag-abot sa yugto sa Liturgy, dihang giisa ni Cardinal Vidal ang ostiya (pormas), nakita ko nga mibangon ang espiritu ni Ma'am Aurora gikan sa iyang lungon ug didto mopaingon sa atong Manunubos nga misugat sab kaniya. Nagluhod si Ma'am nga giakob ang duruha niya ka palad samtang nagtan-aw sa Ginoo. Unya gihikap sa atong Magbubuhat ang ulo ni Ma'am ug giingnan: "Aurora, moestar ka una sa Purgatoryo bali’g usa ka tuig, ayha ka pa makasulod sa Langit.

Nakugang ko sa akong nadungog. Si Ma'am Aurora nga sa akong pag-ila, wala gyoy buling sa sala nga namilit sa iyang kalag, paadtuon pa ma’g-Purgatoryo. Unsa na kaha kadtong mga badlongon, no? Hinay kong nakapanglingolingo sa akong nahimutangan.

Apan si Ma'am, wala gyod motutol. Wala gyod moreklamo sa gikondisyon sa atong Manluluwas kaniya. Hinunoa, malipayon siyang mitubag: "LORD, MATUMAN ANG IMONG PAGBUOT." Dayon, sama sa naglutaw'ng aso, hinay siyang mibalik paghigda sa iyang lungon. (Kataposan)