Ang lumay ni Noy Ekor

Nagpitokpitok ang mga mata ni Vers Qui nga seryosong naminaw sa istorya ni Noy Ekor. Usa ka banggiitang mekaniko si Noy Ekor sa ilang lungsod. Gani, abot sa kasikbit nga mga lungsod, nabantog siya sa ka-maayong moayo sa mga gubang makina, sakyanan o uban pa, ug mo-imbinto og mga butang nga mugna lang sa iyang hunahuna. Gawas sa iyang pagka mekaniko, may pagka-gwatsinanggo si Noy Ekor. Puno usab siya sa mga sugilanon ug mga kinabuang nga istorya.

Ning hapona, interesado kaayo si Vers Qui sa gipaambit nga istorya ni Noy Ekor, kay bahin kini sa pagbuhat og lumay. Ug alang kaniya makatabang   kaayo kini niya’g dako labina nga hangtod karon wala pa gyu’y bisan usang babaye nga iyang gipanguyaban nga misugot kaniya.

"Tinuod kaha na Noy? Epektibo kaha na?" mapusutong sukna ni Vers Qui ngadto sa mekaniko.

"Epektibo mo lang dong Vers Qui! Sa una lagi, sa ulitawo pa ko, ahh klase- klasi lang babaye akong matilawan oy! Dah ... permi laging bun-og si junior" mahambugong saysay ni Noy Ekor nga nakapanghapyod sa iyang atubangang bahin.

Usa ka adlaw, gibuhat ni Vers Qui ang gitudlo kang Noy Ekor kaniya, ang pagbuhat og lumay. Giandam niya ang mga galamiton. Tayming sad nga may himongaan silang bag-ong namiso, nga maoy himuon sa pagbuhat og lumay. Iyang gikuha ang himongaan nga bag-o pa gyung namiso. Sa ilang dakong natad, gibuwag niya og butang ang himongaan ngadto sa iyang mga piso. Sa giingon ni Noy Ekor, ang unang piso nga moabot sa inahan (himongaan) maoy dakpon ug patyon-pisaton sa mga kamot, dayon puston sa panyong itom. Human og putos sa maong piso, ibutang kini ngadto sa nag-inusarang punoan sa lubi, sa may udlot nga bahin. Ug kada alas tres sa hapon sa adlaw'ng Biyernes, sak-on ang maong butang ug orasyonan sa orasyon nga gitudlo usab kaniya kang Noy Ekor.

Ug sulod sa tulo ka Biyernesan kini niya pagabuhaton.

Pag-abot sa ikatulong Biyernes, dinhi gibati na ni Vers Qui ang kahinam nga nagkuha sa maong butang, ug nga gituohan na niyang usa na ka lumay. Dinhi mahibaw-an na gyud niya kun unsa kini ka tinuod ug ka epektibo.

Gisulod kini niya sa gamay'ng garapa nga may sagol nga lana. Tayming kay siya rang usa sa ilang balay. Iya dayon kining gisuwayan og gamit. Human niya’g haplas sa maong lumay, dali siyang nigawas sa balay aron mangita og babaye nga una niyang biktimahon.

Apan kalit mikulismaot ang panagway ni Vers Qui. May nakalimtan siya. Nakalimtan niya ang labing importante nga pasidaan ni Noy Ekor. "Kinahanglan inig huma'g butang sa maong lumay, ang una mong makit-ang babaye, ma-hayop man o tawo, maoy una mong lumayon ug remedyuhon aron kini mo-epektibo. Ug human ana, pwede kanang makapili kun si kinsay sunod mong gusto nga babaye. Busa kinahanglan gyud nga mag-amping," mao kini ang mga pahimangno ni Noy Ekor nga nakalimtan ni Vers Qui.

Ug sipa siyang naka-panaguto kay uwahi na ang tanan. May nakita na siyang babaye. Ug igo nalang siyang milingolingo sa iyang ulo nga puno sa kasayang atubangan sa babaye nga una niyang nakita.

May kahasol sa iyang hunahuna kun mopadayon ba siya, aron mahibaw-an niya kun unsay tubag sa iyang gihaguan. Apan daw sa dili gyud niya kayang romansahon ang babaye nga una niyang nakita, "atay ani Noy Ekor...! unsaon ko man ni Noy..." balikas ni Vers Qui nga nagpanyagit sa ngalan ni Noy Ekor ug dayong patid sa lubot sa babayeng nati nilang baka nga nag-ali sa ilang pultahan. "O-ngaaa....! O-ngaaaa..! (Kataposan)