Lovers in Pari-an

Gula 44

Gikan sa simbahan, misulod sila sa usa ka mahalon nga restaurant. Si Rosalinda ang gipapili sa ulitawo kun unsay mga pagkaon nga iyang gusto.

“Akoy bahala sa gasto,” ni Bongkoy pa nga nagkatawa. “Nakabunal man ko’g Insek ron.”

Gawas sa mga pagkaon nga gipili ni Rosalinda, nag-order pa gayod si Bongkoy og dugang pang mga pagkaon nga nagustohan niini. Naghampuog ang mga pagkaon sa ibabaw sa ilang lamesa.

“Kadaghan ba niini,” buyag ni Rosalinda. “Dili kini mahurot kun kita ray mangaon niini, uy.”

“Sagdi lang gud,” ni Bongkoy pa. “Kutob lang sa mahurot.”

“Unsa bay okasyon, ha?”

“Wa man.”

“Di ko motuo. Nakamatikod kong malipayon ka kaayo. Mora’g espesyal kaayo kining maong adlaw alang nimo.”

Nakita ni Rosalinda ang panagway ni Bongkoy.

“Bitaw,” sa ulitawo pa. “Birthday ron nako.”

“Mao ba?” Nakugang si Rosalinda. “Wa ka man magsulti dayon aron unta makahatag ko’g regalo nimo.”

“Okey lang. Ang imong pagkuyog nako ron igo na nga regalo para nako.”

“Pila nay imong edad ron?”

“Pastilan. Mortal sin ra ba nang pagtug-an sa edad. Bitaw, 22 na ko.” -- Sumpayan pa