Idlas ang katumanan sa gugma

Gula 40

Tinuod nga naglisod gayod siya pag-develop ug pag-delve sa maong mga nobela. Apan nag-amping siyang dili mahatipas sa mga lagda bahin sa pagsulat og fiction sumala sa iyang nakat-onan.

Unya takulahaw lang nahinumdom si Lonia kang Mylene de Jesus, ang girlfriend ni Rev. Kadtong babayhana ang gitumbok niyang hinungdan sa demalas nga midangat sa kinabuhi sa iyang pagpanulat. Sukad lang nga iyang nasayran nga girlfriend ni Rev ang maong babaye, ingon sa gubot na kanunay ang iyang hunahuna ug dili na siya mahinultol sa pagsulat.

Mao nga si Mylene de Jesus, ang snobbish nga girlfriend ni Rev, maoy iyang gibasol kun nganong nagkalitse-litse ang iyang career sa panulat. Nakagusto man gud siya sa hilom ni Rev. Si Rev nga gihigugma niya sa hilom maoy gihimo niyang inspirasyon sa panulat ug dili siya gustong magbaton kini’g hinigugma. Mao nga mora’g gidakdakan siya sa kalibotan sa iyang pagkasayod nga girlfriend ni Rev si Mylene.

Tungod kay dugaydugay na man nga wala moduaw si Lonia sa buhatan sa UCV Romances, kanunay nang mo-text si Rev kaniya. Mangumosta kini kaniya. Usahay magpadala kini’g kataw-anan nga graphics. Apan dili siya mo-reply sa mga text ni Rev kaniya.

May mga higayon gani nga manawag gayod si Rev sa iyang cellphone. Apan dili niya tubagon ang tawag niini. Pasagdan lang niya ang iyang cellphone nga magpunay og bagting kun iyang masuta nga si Rev ang nanawag. Dili siya buot makigsulti niini. Dili pa siya andam nga makigsulti sa iyang editor. -- Sumpayan pa