Ang lab-asera

Banagbanag. Nagkamangkamang sa menteryo sila si Simoy, Isyot ug Tasyo nga mga barangay tanod sa baryo Baring lungsod sa Carmen. Nanagpasalipod sila sa mga nitso sa ilang duol sa sam-ang sa Katoliko. Mogimaw panagsa ilang mga ulo nga mag-ulhos-ulhos aron paglili ni Colasa nga nagpadulong sa usa ka nitso sa bag-ong gilubong nga minatay.

Puro wa nay mga ngipon ang tulo ka tanod. Nangapangag ug nangahingo ilang mga ngipon. Kay nakakaon sa mga isda nga binaligya ni Colasa. Pinaspasan kuno ang maong mga isda. Si Colasa lab-asera sa ilang baryo. Maanyag ug madanihon siya. Maong daghang madani nga mopalit sa iyang tinda. Dagsa ning bayhana sa ilang lugar. Way nasayud kun kinsay iyang mga ginikanan. O diin siyang lugara gikan sa wa pa niabot dinhing lungsora.

Gisunod-sunod ug gipanid-an siya nilang tulo ka tanod.

Kay wa na man mahalin iyang mga isdang tinda tungod sa pagkalunod sa barkong Princess of the Stars, karning baboy na sab iyang gipamaligya. Way nasayud diin angkata ni Colasa ang mga isda. Labi pang way nasayud kun diin sab angkata ang mga karneng baboy. Ang nasayran lang sa mga tawo nga mag-agian si Colasa sa menteryo. Kay ang iyang gipuy-ang balay tua man ibabaw sa bungtod diin ang tiilan niini ang menteryo. Sa kada agi ni Colasa sa menteryo, mapuno iyang hapag sa karne.

Gusto sa mga tanod nga makita gyud nila kun diin manguha si Colasa og mga karneng baboy. Kay kun masayran nila nga unod sa tawo ang maong mga karne, ila dayong ipamalita sa mga katagibarangay aron dili na mopalit sa iyang tinda.

Nihunong si Colasa sa tiilan sa nitso nga iyang gipuntariya. Gibira niya ang marmol nga lapida. Naukang kini. Naabli ang nitso. Gibira niya ang lungon nga sulod niini. Giukban. Nakita sa tulo ka tanod ang sulod sa lungon. Mga tiil, kamot ug ubang bahin sa tawo.

Nidali og barog sa ilang gitagoan si Simoy, Isyot ug Tasyo. Nidagan sila ngadto sa nahimutangan ni Colasa. Gialirongan nila si Colasa. Nakugang la’g kadiyot si Colasa. Unya niisa siya’s iyang duha ka kamot. Kalit nahimong dakong freezer ang lungon. Nag-aso-aso sa kabugnaw ang sulod sa freezer nga nagkadaiyang karne sa baboy, baka, kanding ug manok.

Nakurat ang tulo ka tanod kay nausab og kalit ang palibot. Naniga ilang mga mata ug nanindog ilang mga buhok ug kabalhiboan. Nia na sila sulod sa grocery section sa usa ka dakong department store. Nagpahiyom lang si Colasa nga nagsud-ong kanilang mga tanod nga nangluspad ug gipaningot.

"Gimino ta!" ni Simoy.

"Dali! Balihon nato atong mga sinina!" ni Isyot.

Nag-una og hukas si Tasyo. Hapit sila nagdungan paghuman og hukas. Paghuman og sul-ob nila’s ilang mga T-shirt nga nabali na, nausab ang palibot. Nagbarog sila atubangan sa dakong krus sa menteryo. Nahanaw si Colasa.

Sa ilang kahadlok, nagdali sila’g pauli. Nisilang na ang adlaw. Wa na gyud nila igkita si Colasa.

Dangtag usa ka tuig, wa na gyu’y nakabalita kun hain na si Colasa. Ang mga tawo sa Baring dili na mosalig og mga lab-asera. Adto na gyud sila palit og isda sa merkado. (Katapusan)