Uyab nahimong bayaw

Kining kasaysayan nga akong i-asoy karon alang sa mga suking magbabasa sa Banat News dili akoa kundili sa akong suod nga higala nga mihangyo nga akoy pasuwaton kay dili man siya makamaong mohan-ay alang ning maong tabloid.

Siya si Ramil, taga Ylaya, Ronda, Cebu apan sa pagka karon ania manimuyo sa sitio Iba, barangay Basak, dakbayan sa Lapulapu. Silingan kami.

Kining maong sugilanon nahitabo sa wala pa mahimugso si Ramil. Ug kini iya lang nasayran sa dihang naminyo na siya kang Lotlot kinsa taga didto ra sab sa ila. Ang papa ni Ramil si Meliton. Ang iyang mama si Magdalena. Ang laing karakter sa sugilanon mao ang iyang uyoan nga si Felix. Ug sumala sa asoy ni Ramil.

Si Magdalena uyab ni Felix nga igsuon ni Meliton. Wa pa makaila si Meliton kang Magdalena niadtong panahona. Si Felix ug si Meliton nanarbaho sa Davao. Miuna og uli sa Cebu si Meliton ug nagpabilin si Felix. Pag-abot ni Meliton sa Cebu nagkaila sila si Magdalena. Unya nauyab sab ni Meliton si Magdalena.

Way kalibutan si Magdalena nga ang iyang uyab nga si Felix igsuon diay ni Meliton. Nagkasabot sila si Meliton ug Magdalena nga magminyo. Gipatawag ni Meliton si Felix sa Davao ug giimbitar sa kasal nila ni Magdalena. Miuli si Felix aron pagtambong sa kasal ni Meliton. Apan nahingangha si Felix kay ang pangasaw-onon sa iyang igsuon ang iya man diay'ng uyab!

Dako ang pagtahod ni Felix kang Meliton nga iyang maguwang busa wa na lang siya mosupak bisan sakit sa iyang dughan. Pagkahuman sa kasal nila ni Meliton ug Magdalena sa simbahan sa Our Lady of Sorrows mibalik si Felix sa Davao ug iya pang gibinlan og singsing isip handumanan sila si Meliton ug Magdalena.

"Karon ulitawo pa si Tiyo Felix," panapos ni Ramil. (Kataposan)