Gula 31
Diha siya sa lawom nga pagpamalandong atol sa pagtingog sa message alert tone sa iyang cellphone. Gikab-ot niya ang iyang shoulder bag nga nahimutang dapit sa ulohan sa iyang kama ug gikuha ang cellphone. Iyang gisusi kun kinsa ang nag-text kaniya.
Gikan kang Rev ang text. Iyang gibasa. “Aprub na ang 2 novels nimo. Puyde na ka mo-sign og contract. Aprub na sab ang imong storyline. Sulata na kini.”
Nalipay si Lonia sa maong balita gikan kang Rev. Apan ang gibati niyang kalipay gipulihan lang usab dayon sa kasubo. Misulod pagbalik sa iyang hunahuna ang relasyon nila ni Rev ug Mylene de Jesus.
Gisugdan na ni Lonia pagsulat ang lain pa niyang nobela alang sa UCV Romances. Apan ingon sa wala sa kondisyon ang iyang utok. Gubot ang iyang hunahuna nga gitugaw sa nagkadaiyang butang.
Sa pagsulat niya sa nahauna niyang mga nobela, nagsugwak ang iyang mga ideya mao nga kadali ra kini niyang nahuman. Apan karon ingon sa nablangko ang iyang hunahuna. Wala siya motulin sa iyang pagsulat.
Mao kaha kini ang gitawag og writer’s block? Kanang panahon nga bisan unsaon pagpiga sa magsusulat ang iyang hunahuna, dili gayod siya makahunahuna og maayong sulaton? -- Sumpayan pa