Idlas ang katumanan sa gugma

Gula 30

Naghigda na gani siya samtang nagtangtang sa iyang mga sapatos. Unya nabuhian niya ang usa ka lawom nga panghupaw.

Nasagmuyo pag-ayo si Lonia sa dihang gipaila ni Rev si Mylene de Jesus ngadto kaniya, mora siya’g nalipong pagkadungog sa pag-angkon sa ulitawo nga girlfriend niini ang maong babaye.

Wala makasabot si Lonia sa iyang kaugalingon. Ingon sa mibati siya’g pangabubho sa relasyon nila ni Rev ug Mylene de Jesus. Nasayod siyang wala siya’y katungod nga mangabubho sa relasyon sa duha apan mao kini ang matuod nga nahitabo sa iyang balatian karon. Nagselos siya!

Nagsalimuang na ba siya? Tinuod nga wala siya magpaabot nga tugbangan ni Rev ang iyang pagbati ngadto niini, apan dili usab siya buot nga maangkon kini sa laing babaye. Mao nga karon nga iyang nasayran nga may girlfriend na si Rev, ingon sa dili siya makadawat sa maong kamatuoran.

Ingon ba gayod niini ang iyang kapalaran dinhi sa kalibotan? Nga kun kinsa kadtong lalaki nga iyang higugmaon mapanag-iya hinuon sa lain? Ang una mao si Alex nga naminyo ngadto kang Chona. Ug karon mao si Rev nga boyfriend na diay usab ni Mylene de Jesus.

Idlas ba gayod ang katumanan sa gugma alang kaniya? Nakasukot siya sa iyang kaugalingon niining maong pangutana gumikan sa dakong disappointment nga midat-og kaniya. -- Sumpayan pa