Naghilak si Valerie nga nangayog pasaylo sa iyang bana, si Manuel. Hapit na lang siya moluhod sa atubangan ni Manuel. "Pagkadako mong hangal, Valerie. Nahigugma ka sa tawo nga di nimo maangkon hangtod sa hangtod. Gusto mo siyang ilogon gikan sa Diyos!"
"Usa kini ka sala nga gibasolan ko na, Manuel. Tagai kog laing higayon." Miluhod na gyod si Valerie sa tiilan ni Manuel. Mibakho siya. Giumod niya ang iyang nawong sa duha niya ka palad.
"Ikompisal ang imong sala ngadto kaniya, Valerie!" Dayong talikod ni Manuel sa asawa. Mikanaog siya sa ilang balay.
Miyaka si Valerie sa salog sa sala. Midanguyngoy siya. Ug samtang ingon niini ang iyang kahimtang, mitungha sa iyang handurawan ang nangagi.
"Biyaan mo ako, Ben? Unsaon na man lang ang atong gugma?"
Naghilak niadto si Valerie. Hinigugma niya si Ben. Graduating na sila niadto sa haysikol sa ilang lungsod sa San Isidro.
"I'm sorry, Valerie. Gitawag ko sa Diyos. Para ko kaniya."
"Pero, Ben, gihigugma ko ikaw. Way kamatayon ang pagmahal ko nimo."
Wa gyod kapugngi ni Valerie si Ben. Misulod gyod sa seminaryo ang iyang hinigugma. Napari si Ben ug nakahuman sab sa komersyo si Valerie. Nakatrabaho si Valerie sa munisipyo sa ilang lungsod. Gikaila niya si Manuel ug maoy nahimo niyang bana.
Nahimong parokya ni Padre Ben ang San Isidro. Kanunay magsimbahan si Valerie. Tagdugay mopauli kay makigsulti kang Padre Ben sa kombento. Hangtod niadtong tungora gihigugma gihapon niya si Padre Ben.
Ang kanunay nga pagpakigkita ug pagpakigsulti ni Valerie kang Padre Ben nahiabot kang Manuel. Puwerteng sukoa ni Manuel. Ug mao kini karon, napugos sa pagsulti si Valerie sa tinuod niyang gibati kang Padre Ben ngadto sa iyang bana.
Hapit nalang moluom sa paghilak si Valerie nga naghunahuna sa ilang gugma ni Padre Ben nga wa matagai og katumanan. Wa sila makasala si Padre Ben. Ang iyang gugma sa pari iya lang giluom. Way kasayoran niini si Padre Ben.
Huwebes Santo. Init kaayo ang panahon. Nagluhod si Valerie sa gawas kompisalan. Naghilak siyang nagkompisal ngadto kang Padre Ben.
"Padre, gihigugma ko ikaw!"
"Ayaw mansahi ang akong sotana, Valerie," matud ni Padre Ben sa sulod sa kompisalan. Nasayod siya nga si Valerie ang nagkompisal kaniya."Pangayog pasaylo sa atong Diyos. Dakong sala ang imong gibati ngari nako. Pangadye og lima ka Maghimaya Ka Maria, lima ka Amahan Namo. Sige na, Valerie, linisi ang imong kasingkasing ug hunahuna ning adlaw nga gisakit si Jesus sa krus."
Nanglabay ang mga adlaw. Malipayon na si Valerie ug Manuel. Wa na si Padre Ben sa San Isidro. Nagpabalhin siya og laing parokya, sa layong parokya nga di maabot sa gugma ni Valerie.
"Salamat nga gihatagan mo ako'g laing higayon, Manuel. Kalimtan ko na sa hingpit si Padre Ben." Misandig si Valerie sa dughan sa iyang bana samtang nagtupad silag paglingkod sa ilang terrace usa ka gabii nga hayag ang buwan.
"Gimahal tika, Valerie. Di ko gusto nga mahanaw ka nako."
"Unya, nag-akob ang mga ngabil ni Valerie ug Manuel. Niadtong tungora, nagpitik na sa sabakan ni Valerie ang una nilang anak ni Manuel. (Kataposan)