“Come in”, giagda siya ni Rev sa dihang mihana na siya pagsibog.
Milahos siya pagsulod. May pag-ukon-ukon ang iyang mga lakang samtang miduol sa desk ni Rev. Gibati niya ang kabakikaw. Nakabantay siya nga ang babaye nga bisita ni Rev wala gayod motan-aw kaniya.
“Mylene, I want to meet Lonia Duraliza. Siya ang author sa mga pocketbook nga nahimong best seller karon sa mga bookstores,” mapagarbuhong paila ni Rev kaniya ngado sa bisita niini.
Igo ang mipasiplat ang babaye kaniya. Sa una pa lang higayon sa pagkakita ni Lonia sa maong babaye, nakaingon siya nga snobbish kini.
“Lonia, this is Mylene de Jesus, ang opinion editor sa Cebu Daily Mail. She’s my girlfriend,” paila usab ni Rev sa babaye nga bisita niini ngadto kaniya.
Nakalitan si Lonia. Wala siya magdahom nga girlfriend diay ni Rev ang maong babaye. Dihay wala hisabting pagbati nga nabatyagan ni Lonia nga kalit lang mikupog sa iyang dughan.
Nakiglamano si Lonia kang Mylene de Jesus. Lugos niining gidawat ang binukhad niyang kamot. Sa ilang pagpig-itay, namatikdan ni Lonia nga taphaw ang paghangop niini sa ilang panaghimamat. Nakabantay siya nga uga kini og tinagdan kaniya.
“Nakabasa ka ba sa iyang mga pocketbook, sweetheart?” Si Mylene ang girumbo sa pangutana ni Rev.
“Wala,” mubong tubag ni Mylene. Nasayod ka bitaw nga wala koy hilig mobasa of fiction.” -- Sumpayan pa