May ugma pang moabot

Unsa na ba intawon ning nahitabo nato Elen?" nakapanghupaw si Gallardo. "Bag-o pa   lang gani tang giputlan sa linya sa atong telepono, nia na say notice sa VECO."

"Ganina ra man gani nang naghilak si Boyet," mitubag ang asawang si Elen, "kay dili makaduwa sa internet."

"Ngano bang na-ingon man ta niini nga unta kaniadto haruhay man kaayo ang atong pagpuyo?"

"Kaniadto man to, sa manedyer ka pa, unya kay nagsara man ang inyong kompaniya kay naalkansi, busa hasta ikaw wa nay trabaho. Ang ato ganing kotse nga naprenda, tua, naremati. Maglakaw na lang hinuon ang mga bata ngadto sa eskuwelahan."

"Ato lang una nga iprenda ang imong mga alahas, Elen, aron dili maka-undang ang mga bata sa pag-eskuwela."

"Nahurot na man sad nato og prenda ang atong alahas."

Wala na lang motingog si Gallardo nga milingkod sa sofa. Namalik sa iyang panumdoman ang mga nangagi sa iyang kinabuhi. Didto siya magdako sa bukid sa Gawaygaway ug sanglit bugtong siyang anak, siya ang gisaligan sa iyang amahan sa pag-uma sa gamay nilang yuta, hangtod usa ka adlaw niana, "Tay, moadto ko sa siyudad kay mangita ko didto og trabaho."

"Unsa mang trabahoa ang imong makit-an didto nga pagdaro ra man ang imong nakat-onan, Gallardo?"

"Bisan unsa, Tay, basta makasige lang ko og eskuwela."

"Na, hala sige kay ako nalang ang mahibalo dinhi sa atong uma."

Didto sa siyudad, nagtrabaho si Gallardo sa konstraksiyon ug nagtungha siya sa gabii. Nakahuman siya sa komersiyo ug nahimong manedyer sa usa ka appliance outlet. Wala madugay nagsugod ang maayong dagan sa iyang kinabuhi hangtod nga nagsara ang kompaniya.

Usa ka hapon nga gikan siya nga mitambong sa creative writing seminar nga gidumala sa iyang higala nga si Galliver Samson.

"Elen, gitudloan ko sa akong higala nga gradwuado sa creative writing sa England. Dali ra kaayo ang iyang paagi nga dili narration kundili mga dialogue sa mga karakter, sayon sabton kay ang narration, pareho ka lang sa naminaw sa "Kuwento ni Lola Basyang."

"Unya, makat-on kaha ka ana?"

"Nakat-on man gani ang usa nako ka kahigala nga 63- anyos na ug karon daghan na siya'g sinulat og usa ra ka bulan ang pagtudlo kaniya."

"Di, mag-writer ka na lang, maayo na kay nia ra kas balay sige og sulat."

"Abi nako og wa na koy paglaum, duna pa man diay."

"Natural," tubag ni Elen, may ugma pa gong moabot." (Kataposan)