Sugilanon

Unsa kaha ang kahimtang ni Nilda karon? Dalaga pa kaha siya? Mga pangutana ni Gally sa iyang kaugalingon samtang naglupad ang eroplano nga iyang gisakyan gikan sa Hawaii.

Namalik sa iyang panumdoman ang mga nangagi biente singko ka tuig sukad sa iyang pagikan sa ilang lungsod sa Asturias. Mga bata pa sila sanglit si Nilda trese lang samtang siya kinse pa lang.

"Asa man ka, Gal, kay matud nila molarga ka man kono?" nangutana si Nilda kaniya.

"Gikuha man ko sa akong uyoan nga tua sa Hawaii, Nil."

"Unya, imo diay kong biyaan dinhi?" matud ni Nilda nga kahilakon.

"Ikuyog ta man ta ka, pero di man kuno mahimo kay daghan man konong papeles ang hikayon, gawas pa dako man kuno kaayo ang plete sa eroplano. Sige lang Nil, kay kun makakuwarta ko didto, paadtoon ta ka."

Mihilak si Nilda nga namulong, "Di na ko nimo, Gal, oy, imo man lang kong biyaan," dayong dagan niini pauli sa ila. Apan sa dihang molarga na siya nianang usa ka buntag, miabot si Nilda. "Gal, pasayloa lang ko kay matud ni mama dili kuno sayon ang pag-adto sa Hawaii. Pero dili tika kalimtan Gal, maghulat ko sa imong pagbalik."

"Balikon tika, Nil, una matapos ang akong kinabuhi, ako nang saad nimo."

Hilabihan ang kahinangop sa mga tigulang ko na nga mga ginikanan. "Kadugay sad nimong miuli, Gal," matud sa akong inahan, "maayo gani kay hi-abtan mo pa kaming buhi."

"Sagdi lang, ma, pa, kay dili na ta magkalagyo kay dad-on ko kamo sa Hawaii."

"Ayaw na lang, Gal, kay mga tigulang na mi, igo na kaayo namo ang imong gipadala nga kuwarta kada bulan," mitimang ang iyang amahan.

"Kumosta man diay si Nilda, ma?"

"Sus! Adtoa didto kay daghan kaayong nangulitawo apan way gisugot kay ikaw ang gipaabot. Maluoy kaayo ko nianang bataa kay buotan kaayo."

"Sige, ma, arion sa nako," dayon niyang putos og mga chocolate nga mga Baby Ruth nga maoy iyang paborito.

Sa pagkakita ni Nilda kang Gally, midali kini pagkanaog aron sugaton ang ulitawo, apan nahulog kini sa hagdan, ug nasalo kini ni Galy nga mao gayuy pag-tangka.

"Ka-guwapo na god ron nimo, Gal, mora ka man hinuon og namistiso."

"Mao gihapon na, Nil, og kun naguwapo man, ako nang gi-andam alang nimo."

"Unsay buot mong ipasabot, Gal?"

"Nga magpakasal ta una ko mobalik sa Hawaii kauban ka ug adto na ta puyo," dayong ukob niya sa mga ngabil sa dalaga. (Katapusan)