Andam na ang mga gamit ni Jigger. Gunting, sudlay ug blade, iya nang giluklok sa bulsa sa short niyang maong. Nagsaad man gud niya si Kagawad Fernando nga magpatupi niya rong adlawa. Nabantog naman gud ni si Gerpak (maoy iyang angga) sa kamaayong motupi ug maoy kuhakuha-on kun may magpatupi kaniya.
Mao na kini ang iyang pangita matag adlaw aron siya makasapi. Bayente pesos ang iyang pangayo kada ulo nga iyang matupihan. Pero kun ingon ani nga siya’y paadtu-on sa balay sa iyang tupihan, labing gamay, sengkwenta pesos ang iyang pangayo.
Nakapahiyom si Gerpak kay sayod siya nga dako dako gyud ang suhol basta kini maoy magpatupi kaniya. Kun dili sengkwenta, usa ka gatos ka pesos ang ihatag. Paglabang ni Gerpak sa kalsada, maoy iyang nahinagboan ang gwatsinanggo niyang silingan, nga si Traypol.
"May lakaw ka pak?" ni Traypol nga nanghinapay sa kalkag niyang buhok gamit ang mga tudlo.
"Unta, naa koy tupihan sa unahan. Ngano man?" ni Gerpak.
"Akoy unaha'g tupi, Pak bi! Ako lay bahala nimo," hangyo ni Traypol nga dala pasalig ngadto kang Gerpak.
Wala niya kini balibari. Kwartay iyang gipangita. Ug maikog usab siya mobalibad sukad masukad karon pa kini magpatupi. Si Vers Qui man gyud unta’y tigtupi ning tawhana, pero kay nilarga na man ang naulahi sa Cebu, mao nga sa iyaha nalang kini nagpatupi.
Sa natad nilang Traypol gisugdan dayon ang tupi. Nagpitipiti ang gunting ni Gerpak nga nag- sakdapsakdap sa ulo ni Traypol. Semi-upaw ang gusto ni Traypol. Pila ka minutos, nahuman ang maong tupi. Gamit ang bunot sa lubi, gitapdasan dayon ni Gerpak ang bukobuko ni Traypol nga daghang mga buhok nga namilit.
Pagkahuman niyag tapdas, ang iya na usab nga kaugalingon ang gitapdasan kay may namilit man sab nga mga buhok sa iyang mga kamot.
Dako gyud ang pagtuo ni Gerpak nga dakodako gyud ang isuhol ni Traypol, kay nipasalig gyud kini kaniya nga siya’y bahala.
"Day...! Day...! ari gud diri," ni Traypol nga nagsangpit sa iyang asawa, "unta'g ... usa ka gatos ang ihatag" ni Gerpak nga nag-kibotkibot ang baba.
"Unsa man Dong?” sa asawa ni Traypol nga nipaduol sa ilang nahimutangan.
"Day, suholi gud ni's Gerpak og samporado Day, sukari kay basin gigutom ni," ni Traypol dayog isa sa iyang usa ka kumagko nga pina-thumbs-up ngadto kang Gerpak, dayong kihat sa usa ka mata.
Daling nahi-ulpot si Gerpak sa iyang nahimutangan.
"Ayayayyyy....! gitiiii .... sss kagang kang Traypola ka..! Abi ko ba'g dako ka'g ihatag kay nipasalig ka man nga ikaw bahala. Sus...! samporado man diay ang imong gipasalig. Hala...! Ikaw nala’y lamoy ana Traypol uy...! kay busog pa ko!" ni Gerpak dayong lingolingo sa iyang ulo.
"Sukad sa akong pagka-manupihay karon pa ko ka-tupi, nga ang suhol samporado," bagutbot ni Gerpak dayong pahilayo sa ilang Traypol. (Kataposan)