Lovers in Pari-an

Gula 25

Sayong mibangon si Rosalinda nianang pagkabuntag. Samtang naghikay si Tasing sa kusina, gilimpiyohan niya ang lawak ni Atty. Pomposo Gumera.

Migawas si Atty. Gumera sa pagsulod niya sa kuwarto niini aron wala’y makabalda sa iyang pagpanglimpyo. Ang abogado didto mopahimutang sa sopa sa sala, nagkalingaw og basa sa buntagong pamantalaan samtang nangape.

Migawas siya sa lawak ni Atty. Gumera human kini niya malimpiyohi. Gitawag siya sa iyang agalon. Gisenyasan siya niini sa pagduol sa nahimutangan niini sa sopa.

“Dawata kini,” sa abogado pa nga mitunol og sobre kaniya.

“U-unsa man ni, Atorni?” Nakapangutana siya.

“Pasiuna sa imong suweldo. Ihatag ko kini kanimo aron kapadad-an mo na’g kuwarta ang imong mga ginikanan.

“S-salamat, Atorni,” ni Rosalinda pa dayong dawat sa sobre.

Pasado alas nuybe sa kabuntagon mibiya si Atty. Gumera sa balay paingon sa law office niini sakay sa awto nga gimaneho ni Bongkoy. Dihang sila na lang duha si Tasing ug Rosalinda sa balay, nananghid ang dalaga ngadto sa hamtong. -- Sumpayan pa