Idlas ang katumanan sa gugma

 Gula 17

Ingon sa nakabaton og bag-ong kadasig si Lonia. Bisan wala pay kaseguroan kun maaprobahan ang unang nobela nga iyang gisulat apan nalipay siya sa pagdasig ni Rev kaniya sa pagpadayon pagsulat.

Nagsulat dayon siya’g storyline sa laing nobela nga gusto niyang sulaton. Niining higayona, iyang gipaningkamotan nga mas nindot ang sunod niyang nobela kay sa una niyang gisulat aron mas magustohan kini sa editor.

Wala pa gani niya mahuman pagsulat ang iyang storyline, nag-text na si Rev kaniya. Gipahibalo siya niini nga naaprobahan na ang iyang nobela aron himuon kining pocketbook. Labihan niyang lipaya.

“Lakaw ngari sa office karon or ugma aron makapirma ka na’g contract,” nagkanayon ang text ni Rev.

Misugwak ang kalipay nga gibati ni Lonia. Karon pa lang, iya nang napanghilantawan nga may mahayag siyang kaugmaon sa panulat. At any rate, iya nang namatud-an nga wala siya masayop sa iyang desisyon pag-abandonar sa iyang propesyon isip usa ka magtutudlo.

Nakahukom si Lonia nga ugma na lang siya moadto sa buhatan sa UCV Romances aron pagpirma og kontrata alang sa iyang nobela nga naaprobahan nang himuon nga pocketbook. Apiki na man gud sa oras. -- Sumpayan pa