Gula 16
Iyang nasuta nga dili sayon ang pagsulat, ilabi na kun usa ka nobela ang sulaton. Dili maasi-asi. Daghan ang angay bantayan. Nagkinahanglan og taas nga pailob ang maong buluhaton. Labaw sa tanan, nagkinahanglan og lawom nga pamalandong aron mahatagan niya’g hustisya ang iyang gisulat.
Milungtad gayod og pipila ka adlaw una niya nahuman pagsulat ang nobela nga iyang gitagik. Iya kining gisubli-subli pagbasa. Gikorehian ang nakita niyang mga sayop sa iyang pag-develop sa estorya niini. Unya gi-finalize na niya ang iyang manuskrito aron kini i-submit ngadto sa editor.
“Mo-text lang ko nimo kun maaprobahan na kini,” giingnan siya ni Rev sa dihang gi-submit na niya ang manuscript sa iyang nobela ngadto niini.
“Magpaabot ko,” mubo niyang tubag.
“Pag-submit sab og laing storyline kun gusto ka pang mosulat og laing nobela.”
“M-mahimo pa diay?”
“Nganong dili? Nagdugang kanunay ang demand karon sa mga pocketbook tungod kay nagkadaghan ang mga magbabasa niini. Mao nga nagkinahanglan kami’g dugang mga writer nga makatubag sa panginahanglan sa mga readers.”
Nalipay siya sa gisulti ni Rev. Maoy iyang tuyo nga mahimong usa ka fulltime writer maong gikahinangop niya ang awhag sa editor nga pasabmiton siya’g laing storyline sa nobela. -- Sumpayan pa