Lovers in Pari-an

Gula 18

Nianang pagkahapon, diha si Rosalinda sa tugkaran sa balay. Gipul-ongan niya ang mga dahon sa mga tanom nga labong na kaayo. Iya kining gi-trim aron nindot nga tan-awon.

Naigking si Rosalinda dihang may miigham sa iyang luyo. Sa iyang paglingi, maoy iyang nakita ang ambongang lalaki nga drayber ni Atty. Gumera.

“Hi...!” Mitimbaya kini kaniya dayong duol.

“Hello...!” Mibalos siya pagtimbaya ngadto niini.

“Gidawat ka gyud diay ni Atty. Gumera.”

“Oo. Gikaloy-an sa Ginoo.”

“Maayo hinuon aron alegre na ta dinhi. May kauban na mi si Nang Tasing. Tulo na tang mogimik.”

Wala motubay si Rosalinda sa gisulti sa lalaki.

“Unsa gani ngalan mo?” Sukit sa lalaki.

“Rosalinda,” maoy tubag. “Rosalinda Reños.”

“Ako sab si Bongkoy,” paila sa lalaki sa kaugalingon. Bongkoy Roles.”

“Dugay ka na bang nagtrabaho dinhi?”

“Bag-o pa. Mga tulo pa lang ka bulan. Pero wa na koy plano nga mopahawa dinhi. Nakauyon ko sa atong agawon. Buotan kaayo siya.”

“Abi ko’g anak ka ni Atty. Gumera.”

“Anak gud tawon. Layo ra na sa tinuod, uy.”

“Dili baya. Abi nimo, kun pakalitan ka og tan-aw mong duha, magkaamgid gyud ang inyong hitsura.” -- Sumpayan pa