Kislap sa bag-ong paglaum

Nakapanlingolingo si Ricardo, bag-o pa gani silang giputlan sa PLDT sa ilang linya sa telepono karon nakadawat na usab sila og notice of disconnection gikan sa VECO. Puwerteng hilaka sa iyang siyete anyos nga kamanghuran kay dili na kini makaduwa sa iyang paboritong games sa internet.

Wala magdahum si Ricardo ug sa asawa niini nga si Glenda, nga mahisangko sila aning puntoha nga magkapungapunga sa kalisud sa ilang panginabuhi. Kaniadto haruhay kaayo ang ilang pagpuyo dihang nag-alagad pa siya sa usa ka manager sa Lemontz Lending gani ang iyang tulo ka mga anak nga sila si Joel, Mark ug Bobby iya gayud kining ihatud pinaagi sa iyang Isuzu multicab ngadto sa private school diin ang mga bata nagtungha.

Apan sukad nga wala na siya’y trabaho mga duha na ka tuig kapin napugos siya pagprenda sa iyang multicab gani na-embargo gayud kini sa rural bank kay wala siya makaatiman sa pagbayad sa iyang loan. Nahurothurot na usab og pamrenda sa alahas ang iyang asawa.

Nabalaka kaayo siya sa iyang mga anak basin asa mahisangko ang mga kaugmaon niini, ilabi na dinhi sa Magahob nga dakbayan diin naglimin ang lainlaing matang sa tental. Kaanugon kaha sa mga linghod nga mga damgo niini? Gusto ra ba gayud sa iyang kamanghuran nga si Bobby nga mag-seaman inig ka dako niini.

Sa iyang paminaw layolayo na man unta ang iyang naabot sa kinabuhi, kinsa bay magdahum nga siya nga didto nagdako sa kabukiran sa Malabuyoc mahimong usa ka manager sa usa ka lending firm dinhi sa dakbayan sa Sugbo. Mora og kagahapon pa lang nga siya kaabag sa iyang amahan nga si Manoy Cirilo sa pag-atiman sa ilang uma.

Nakatongtong siya og kolehiyo isip working student. Ug tungod sa maayong transcript of record nasulod dayon siya isip usa ka loans clerk sa Lemontz Lending hangtud nga na-promote pagka branch manager.

Gumikan sa economic crisis nasira ang gialagaran nga lending firm ni Ricardo. Ang iyang separation pay nga nadawat igo ra nga nakasustener sa ilang inadlaw-adlaw nga galastuhan sulod lang sa pipila ka buwan. Ang iyang asawa nga si Glenda nga kaniadto nahimong Miss Colon, napugos na lang pagpaninda og barbecue sa duol nga eskuylahan. Naningkamot si Ricardo pagpangita og trabaho apan tungod sa iyang hingkod na nga pangedaron nga singkuwenta anyos na ug sa atong dili maayong kahimtang ekonomikanhon naglisud gayud siya.

Usa niana ka hapon gikan si Ricardo nga nag-attend og prayer meeting sa Sto. Rosario Church, gisugat siya sa iyang asawa.

"Ric dinhi kaganina si Tatay Cirilo, nag-ingon kadto nga kun gusto ka ikaw na kunoy iyang tugyanan sa inyong umahan didto sa Malabuyoc dili na kuno makaya sa iyang lawas. Igo lang kini nakahuman og hatag sa iyang pasalubong sa iyang mga apo ug wala kini magdugay nilakaw dayon kay mabiyaan unya kuno siya sa bus," matud ni Glenda.

Dihadiha kalit nga may migitib nga bag-ong paglaum sa kahiladman ni Ricardo. Ngano man tuod nga dili siya mobalik sa probinsiya diin didto siya nagdako sa lugar nga yano ra kaayo ang panginabuhi ug ang mga panginahanglan sa mga tawo. Sa maong dapit wala’y internetan, dili private school ang eskuylahan pero malaumon

 si Arnulfo nga makakat-on ra sila og adjust ilabi na ang iyang mga anak sa kinabuhing banikanhon. (Kataposan)