Lovers in Pari-an

Gula 17

Wala motingog si Rosalinda. Sa gipanulti ni Nang Tasing, karon pa lang gani daw naseguro na niya nga ania siya sa maayong mga kamot.

“Ilado ug respetado si Atty. Gumera dinhi sa Pari-an, Day.” Matud na usab ni Nang Tasing. “Nag-alagad siya isip kapitan sa Pari-an sulod sa tulo ka termino. Pagkahuman daghang miawhag niya nga molansar pagka-konsehal sa siyudad. Pero wala siya’y interes nga magpapili sa mas taas nga posisyon. Maoy iyang gipalabi ang iyang propesyon.

“Diay ba,” mao ray nasulti ni Rosalinda.

“Ingon niana si Atty. Gumera dili hangol og katungdanan.”

“May anak ba si Atty. Gumera, Nang?”

“Aduna. Si John Henry. Usa ka doktor. Pero tua na karon nanimuyo sa Amerika. Tua man didto ang iyang trabaho.”

“Tua diay usab sa Amerika ang pamilya sa anak ni Atty. Gumera?”

“Pamilya gud tatot. Ulitawo pa tong anak ni Atorni, uy. Gisigehan na man gani kadto’g apura ni Atorni nga magminyo na. Apan hangtod karon, mora’g wa pa man gyu’y timailhan nga magminyo na kini.”

“Kun mao kana, Nang, si Atty. Gumera ra diay ang atong silbihan dinhi?

“Mao gyud. Basta, di bug-at ang atong trabaho dinhi.” -- Sumpayan pa