Ang sinalikway

Ayaw na lang pag-usik-usik sa imong panahon nako Procupio kay wala ka gyuy maani, miprangka si Senyang sa ulitawong gulang.

 Sa paglakaw ni Procupio, nagbagolbol pa si Senyang sa pag-abot sa iyang inahan gikan sa merkado.

"Naunsa ka Senyang nga sayo ka man nga nagyawit diha?"

"Da, kanang si Procupio, magsige’g balikbalik, ako na nga giprangkahan karon nga dili na pabalikon kay wa siyay maani."

"Nalukop man lang na og pangulitawo apan wa gyuy misugot. Maguwang man na nako og lima ka tuig, ug nangulitawo man gani na nako sa dalaga pa ako."

"Kinsa man say masayop nga mosugot niana nga bati kaayo'g nawong, naa pay ilong nga patuyang lang og katay, mora'g agbati."

Puno sa mga pagtamay si Procupio nga usa lang ka manananggot. Apan bisan ingon niana si Procupio, kugihan ug matinabangon kaayo kini sa isig-katawo.

Usa ka buntag, samtang nanilhig sa nataran si Senyang, may mihunong sa iyang tungod nga bag-o kaayong Mercedes Benz. “Miss, hain man ning balay ni Procupio San Agustin?"

"Kanang payag, ay," mitudlo si Senyang. "Ngano man unta?"

"Iya man ning awto. Gipadala sa iyang maguwang una mamatay ug duna pa siyay $15 million sa Bank of America."

"Kinsa ka man diay, sir?'

"Ako ang abogado sa iyang igsoon sa Hawaii," dayong sakay sa tawo paingon sa payag ni Procupio.

Wa pa gani maudtohi, mikaylap na ang balita sa tibuok lungsod sa Kandihina nga milyonaryo na si Procupio. Nianang pagkahapon, sakay si Procupio sa bag-ong Mercedez paingon sa siyudad kauban ang abogado. Duha ka semana nga nawala si Procupio ug sa pagbalik niini, naka-terno na sakay sa Mercedez nga may kaugalingong drayber ug guwapa nga sekretarya sa iyang tupad.

Misugat kaniya hapit tibuok barangay ug nagpahikay dayon siya didto sa balay sa pinakadato sa ilang lungsod diin adto abot si Procupio samtang nagpahimo pa siya sa iyang mansiyon. Si Senyang, hapit dili na lang mobulag sa tupad ni Procupio ug nakig-away kini sa dihang gibadlong sa sekretarya.

Kada adlaw tua lang ang mga nawong sa mga dalaga lakip si Senyang nga makighinabi kang Procupio nga kaniadto ilang giayran ug gisalikway. Apan wala na patental si Procupio kanila, ug pagkahuman sa mansiyon ni Procupio, gipahibalo dayon ug gidapit ang tanan sa kasal sa lalaki ug sa iyang sekretarya.

Hilabihan ang hilak ni Senyang sa kasal sa lalaking kanhi iyang gitamay ug wala gani kini motambong sa hikay. (Kataposan)