Lovers in Pari-an

Gula 16

Gidala una ni Tasing si Rosalinda ngadto sa servant’s quarter aron ikapahimutang niya ang iyang mga gamit. Ang servant’s quarter buyon ra sa garahe diin adto magkatulgan ang drayber ni Atty. Gumera.

“Mao kini imong kuwarto,” ni Tasing pa. “Kanang sa pikas, mao kana ang akong katulganan.”

Dayon gidala siya ni Tasing sa kusina. May gihikay diay si Tasing sa kusina nga nabiyaan dihang gipatawag kini ni Atty. Gumera kaganina.

“Akoy kusinera dinhi,” matud ni Tasing. “Ikaw na maoy maglimpiyo matag adlaw sa lawak ni Atty. Gumera. Magtinabangay na lang kita sa ubang mga bulohaton sa balay sama sa pagpanglimpiyo sa tugkaran, sa katibuk-an sa balay, pagpanglaba ug uban pa.”

“Sige, Nang,” ni Rosalinda pa. “Uyon ko niana.”

“Suwerte kaayo ka nga si Atty. Gumera ang nahimo mong agawon.”

“Ngano man diay, Nang Tasing?”

“Buotan kaayo na siya, Day.”

“Mao ba? Dugay ka na ba dinhi, Nang?”

“Dugay na, uy. Buhi pa kadtong iyang asawa, nag-alagad na ko niining balaya. Hangtod karon, nia lang gihapon ko. Ang akong mga anak nga tua sa probinsiya, gusto na unta nila nga mopahuway na ko sa pagpanarbaho. Pero di ko makabiya ni Atty. Gumera. Maikog ko tungod sa iyang kaayo.” -- Sumpayan pa