Idlas ang katumanan sa gugma

Gula 12

“Okey, Sir,” ni Lonia pa nga nahinangop.

“Rev na lang,” sa editor pa. “Mora’g pormal ra sab kaayo kun sangpiton ko nimog Sir.”

“I-ikaw ang mag-igo, R-Rev.” matahaon nga pamulong ni Lonia.

“Pag-submit dayon sa imong storyline,” nagkanayon si Rev. “Kun magustohan nako ang imong istorya, ipasuwat dayon nako nimo ang katibuk-an sa nobela nga himuong pocketbook.”

Gituman ni Lonia ang gisulti ni Rev Florentino kaniya. Nagsulat dayon siya’g storyline sa nobela nga buot niyang sulaton. Uban sa mubo niyang resume, iya dayon kining gi-submit ngadto sa editor.

Daklit nga gitamdan ni Rev ang iyang storyline ug unya maoy gisunod niinig basa ang iyang resume.

“Usa ka man diay ka magtutudlo,” nagkanayon si Rev nga mitutok kaniya. “Ug major in literature pa.”

Yango ray gitubag ni Lonia. Miduko siya kay dili siya makaharong sa tinan-awan ni Rev kaniya nga naghatod og talagsaong kakulba sa iyang dughan.

“May panahon ka pa kaha sa pagsulat?” sukit ni Rev. “Nasayod kong daghan kaayo’g buluhaton ang usa ka magtutudlo.”

“W-wa na ko magtudlo karon,” niya pa. Misantop sa iyang hunahuna nga wala maapil pagbasa ni Rev ang gisulat niyang resigned na siya sa iyang trabaho isip magtutudlo segun sa iyang gibutang sa iyang resume.

“Ngano man?” misamot pagtutok si Rev kaniya. -- Sumpayan pa