Lovers in Pari-an

“Batan-on ka pa man. Pila na bay imong edad?”

“Bayinte uno na, Atorni.

“Kahuman ka na ba'g eskuyla?”

“Oo, sa hayiskol. Sa miaging tuig lang gyud. Dugay kong nakahuman sa hayiskol. Kanunay man gud kong makapalta sa pag-eskuyla tungod sa among kawad-on.”

“Unsang klaseha sa trabaho ang imong nakamaohan?”

“B-bisan unsa, Atorni. Anad ko sa mga trabaho sa balay sa amo. Motabang man sab gani ko nilang Tatay sa umahan.”

“Mao ba?” Sa abogado nga ingon sa nahimuot sa iyang gisulti. “Buotan ka gyud diay nga pagka-anak.”

Unya, may gitawag si Atty. Gumera. Tasing ang ngalan sa gisangpit niini. Wala madugay, nahiabot sa ilang nahimutangan ang hamtongon nang babaye gikan sa kosina. Nagsul-ob kini'g hairnet sa ulo. Nagsul-ob usab kini'g apron.

“Ngano Atorni?” Pakisayod gilayon sa babayeng hamtong.

“Siya si Rosalinda,” sa abogado pa ngadto kang Tasing. “Siya nay katimbang nimo karon sa mga buluhaton dinhi sa balay. Ikaw nay maantigong motudlo kaniya sa angay niyang buhaton.”

“Oo, Atorni,” ni Tasing.

Misugwak sa kahiladman ni Rosalinda ang kalipay nga gidawat siya ni Atty. Gumera isip katabang sa panimalay niini. May trabaho na gyud siya. Makatabang na gayod siya sa kabos niyang mga ginikanan nga atua sa probinsiya. -- Sumpayan pa