Lovers in Pari-an

Gula 13

Kinahanglan gyung makakita siya’g trabaho karong adlawa. Kun mapakyas siya, wala siya masayod kun asa siya matulog karong gabii. Wala ra ba siya’y mga paryente o kaila nga kadangpan diri sa siyudad.

Sa nadugay niyang paglakaw, nahiabot siya sa police station sa Barangay Pari-an. Mipadayon pa gayod siya paglakaw. Didto sa unahan natukmaan niya ang gate nga puthaw diin may gipapilit nga papel nga gisulatan sa pahibalo: “Wanted Lady Helper, apply inside. Misantop sa hunahuna ni Rosalinda nga mosulay sa pagpangaplay dinhi –- sa residensiya ni Atty. Pomposo Gumera.

Gipislit niya ang buzzer sa gate. Naghulat siya’g pipila ka gutlo. Wala’y miduol sa pultahan sa gate aron pag-abli niini. Giusban niya’g buzzer makaduha. Wala madugay diha’y miabli sa pultahan. Unya nabantang sa iyang panan-aw ang usa ka lalaki nga ambongan. Apan nagkahugaw ang mga kamot ug sinina niini sa asiyete ug grasa. Nagkadusingot.

“Unsay ato?” Sukit sa lalaki kaniya.

“Naa ba si Atty. Gumera?” Misumbalik siya pagpangutana.

“Oo. Ngano man diay?”

“May tuyo ko niya. Mangaplay unta ko’g trabaho.” -- Sumpayan pa