Idlas ang katumanan sa gugma

Gula 9

“Pero nagkinahanglan kag break aron makabaton og ngalan sa maong field. Kinsa man kaha ang makahatag nimo og break?”

“Mao kana ang unang challenge nga akong atubangon, Ate. Para nako, ang pagsugod ra maoy lisod. Ug husto ka, nagkinahanglan ko’g break. Once nga masugdan na nako ang pagsulat, mas dali na ang mosunod. Ang gikinahanglan ko lang karon mao ang editor nga mosalig kanako ug mohatag kanako’g higayon sa pagpamatuod sa akong katakos.”

“Kun mao na gyud kana ang nakab-ot mong desisyon, dili ko ikaw pugngan. Panghinaoton ko ang imong kalamposan. Good luck, Sis.”

“Thank you, Ate.”

Ang unang gihimo ni Lonia mao ang pagpakigkita sa editor-in-chief sa Cebu Daily Tribune nga si Mr. Augusto Suan. Mi-apply siya nga mosulat og column sa lifestyle section sa maong pamantalaan. Apan gibalibaran siya sa editor. Tugob na kuno sa kolumnista ang ilang pamantalaan ug wala pa sila magplano sa pag-hire og dugang mga kolumnista.

Ang kapakyas sa una niyang pagpangaplay wala makapalong sa iyang kadasig ug tinguha nga makasulat. Mi-apply siya sa Cebu Golden Chronicle. Pagka kolumnista gihapon ang iyang giaplayan. Apan gibalibaran gihapon siya sa editor. Huyhoy ang iyang mga abaga nga migawas sa buhatan sa maong pamantalaan. -- Sumpayan pa