Lovers in Pari-an

Gula 11

Aron dili siya malangan pag-ayo, nakahukom siyang magpakisayod. Giduol niya ang usa ka tindero og pamantalaan ug nangutana kun asa moagi ang mga dyip nga 06B ug 06F.

“Diha sa sunod eskina,” tug-an sa tindero.

Human kapasalamati ang tindero, milakaw na usab siya. Mipaingon sa eskina nga gitudlo niini kaniya. Samtang naglakaw, nakaingon siya sa iyang kaugalingon nga kapoy ug hasol man diay ang pagpangita og trabaho sa siyudad.

Mihunong ang dyip nga iyang gisakyan sa luyo sa simbahan sa Guadalupe. Mikanaog si Rosalinda. Iyang giduol ang usa ka babaye nga nag-apong sa gibaligya niining mga bibingka. Gipangutana niya kini kun hain ang balay ni Engr. Teklo.

“Kana,” gitudlo sa gulangong babaye ang dakong balay nga pinintalan og puti og asol nga nagbuntaog sa unahan.

“Salamat, Nang,” niya pa dayong talikod ug milakaw.

Mipaingon na siya sa balay nga gitudlo sa babaye. Iyang natukmaan nga serado ang pultahan sa gate nga puthaw niini. Ang gate lapaw sa tawo ang kahabog. Sa ibabaw niini may karatola nga nagkanayon: Engr. Ramonsito Teklo, Civil Engineer.-- Sumpayan pa