Lovers in Pari-an

Gula 10

Human makakaon, mipadayon siya paglakaw. Wala madugay, natukmaan niya ang tindahan sa mga appliances. Nakabig ang iyang pagtagad sa papel nga gipapilit sa bungbong nga bildo sa maong tindahan. May nahisulat nga “Wanted Housemaid, Please Inquire Inside.”

Nahinangop si Rosalinda. Nagtuo siya nga kini na ang tubag sa iyang suliran. Misulod siya sa tindahan. Iyang gipangutana ang usa ka babaye nga sa iyang pagtuo, sales lady sa maong tindahan.

“Kamo bay nagkinahanglan og housemaid?” Niya pa.

“Dili kami,” mubong tubag sa babaye. “Si Engr. Ramonsito Teklo.” E-Engr. Teklo?”

“Oo. Tua ang iyang balay sa Guadalupe. Luyo sa simbahan.”

“Asa man nang dapita, uy? Di pa ra ba ko suheto sa siyudad, da. Bag-o pa man ko dinhi.”

“Sakay lang og jeep nga 06B o 06F. Adto gyud na sangko sa luyo sa simbahan sa Guadalupe. Pangutana lang didto. Ilado kaayo si Engr. Teklo dihang dapita.”

Human makapasalamat sa babaye, migawas si Rosalinda sa tindahan. Misubay na usab siya sa aseras. Matag karon ug unya, basahon niya ang mga numero nga gitangkil sa nagdagan nga mga PUJ. Apan wala siya’y nakitang dyip nga nagdala sa numero nga 06B ug 06F. -- Sumpayan pa