Gula 5
Karon buot nang magbasol si Lonia kun nganong nangahas pa gayod siya pagtambong sa kasal nilang Alex ug Chona. Dili unta mosamot ang gibati niyang kasakit gumikan sa kapakyasan sa iyang gugma ngadto kang Alex, gugma nga wala gayod kahatagi’g kagawasan bisan sa makadiyot na man lang.
Dihang mimando na ang pari ngadto nila ni Alex ug Chona nga puyde na silang maghalok, mitalikod si Lonia. Milakaw siya paingon sa gawas sa simbahan. Dili na siya buot nga makasaksi sa maong talan-awon kay tingali pa man unya kun dili na gayod siya makapugong sa iyang kaugalingon.
“Minyo na gyud sila si Alex ug Chona, Ate Greta,” sumbong ni Lonia sa iyang maguwang nga nagpuyo sa Guadalupe.
Minyo na si Greta ug may usa na ka anak. Bugtong kining igsuon ni Lonia. Sukad nga mitaliwan ang ilang mga ginikanan si Greta na ang nahimo niyang bugtong sumbonganan sa iyang mga suliran. Si Greta lang ang bugtong nasayod nga nahigugma siya sa hilom ngadto kang Alex. Dili mauwaw si Lonia nga motug-an ngadto kang Greta sa iyang mga sekreto.-- Sumpayan pa