Idlas ang katumanan sa gugma

Bisan sa maong kasayoran, wala mausab ang iyang pagtagad ngadto nila ni Alex ug Chona. Naka-manage gihapon siya sa pag-control sa iyang kaugalingon. Gigamit niya ang propesyonalismo. Nagpadayon ang kasuod nilang tulo ilabi na kay nagtudlo usab sila sa samang eskuylahan.

Hinuon, aduna gyu’y mga higayon nga bation ni Lonia ang pangabubho, ilabi na kun makita niya sila si Alex ug Chona nga malipayon. Apan gipaningkamotan niyang dili mamatikdan sa duha ang iyang gibati.

Karon...kaslon na gayod sila si Alex ug Chona. Mao na kini ang adlaw nga mahingpit ang paghiusa sa duha nila ka gugma. Mao usab kini ang adlaw sa kataposan sa paglaom alang kang Lonia.

Gisugdan na sa pari ang seremonyas sa kasal. Si Lonia wala magpaduol sa gikasal. Nagpaantaw lang siya kanila. Apan sukad sa iyang nahimutangan makita niya pag-ayo ang duha nga pulos malipayon. Napulos pahiyom ang miaslay sa panagway ni Alex.

Namati pag-ayo si Lonia sa tubag nila ni Alex ug Chona sa dihang gipangutana na sila sa pari. Pulos “oo” ang ilang gitubag sa mga pangutana sa pari, butang nga nakapasamot sa gibating kasakit sa dughan ni Lonia. -- Sumpayan pa