Idlas ang katumanan sa gugma

Gula 3

Alang kang Lonia, cheap ra usab siya kaayo kun idudho gayod niya ang iyang kaugalingon ngadto kang Alex. Bahala na’g dili siya mahalin basta dili gayod siya maghagit-hagit sa lalaki nga iyang nagustohan. Prinsipyo kini ni Lonia nga iya gayod nga gibarogan hangtod sa panahon nga si Alex napanag-iya na sa laing binuhat.

Tingali dili gayod sila alang sa usa’g-usa. Mao kini ang diyotay’ng konsolasyon nga gihatag ni Lonia sa iyang kaugalingon.

Dugay na siyang nagpaabot nga mangulitawo si Alex kaniya. Sukad sa hayiskol pa sila, hangtod nga nagtungha na sa kolehiyo ug hangtod nga nahimo na gayod silang hingpit nga magtutudlo. Taas gayod kaayo ang kutay sa panahon sa iyang pagpaabot sa gugma ni Alex.

Apan karon nakaamgo si Lonia nga dili diay ang tanang gipaabot segurado gyud nga mahiabot. Aduna usay makawang nga pagpaabot. Sama sa nahitabo kaniya. Wala siya’y naani sa iyang pagpaabot nga mahigugma si Alex kaniya. Apan hinigala lang ang pagtagad ni Alex kaniya. Very civil ang maong lalaki. Ug mao na lang ang iyang kahisagmuyo sa dihang usa ka adlaw niana, mao na lamay iyang nasayran nga nagkahigugmaay na sila si Alex ug Chona. -- Sumpayan pa