Sama sa hulmigas nga naukay ang mga tawo diha sa among barangay, sa dihang mikatap ang balita, nga kaslon na sa umaabot nga Sabado, sila si Betoy ug Daylin.
Si Betoy nga usa lang ka agwador ug si Daylin nga bag-o lang nakatapos sa kursong nursing, ug anak pa gyud sa usa samga konsehal sa among barangay.
Daghan man gud ang dili motuo sa maong balita. Dili man gud sila makatuo, nga si Betoy nga usa lang ka agwador ug kanunay lang ganing yagayagaan sa mga batan-on, tungod sa iyang pagkabatabataon, maoy pamanhon ni Daylin.
Ang babaye nga giila ug gitahod kaayo sa kadaghanan tungod sa iyang pagkabuotan. Ug anak pa gyud sa mga tinamod nga mga ginikanan. Kay konsehal lagi ang iyang amahan.
Makapahibulong bitaw kaayo, kun nganong si Betoy pa maoy gipamana ni Daylin, nga unta daghan man kaayong mga lalaki ang nangulitawo kaniya? Mga propesyonal pa gani ang uban niini ug mga hitsuraan pa.
Hasta hinuon ko, giabot og dakong kalibog. Nakaingon hinuon ko, kun unsa kahay nakaon ni Daylin nga makigminyo man kang Betoy? Nagduda na hinuon ko nga tingalig gilumay kini ni Betoy. O gipugos ug gihulga ba kaha. Maong napugos nalang sa pakigminyo kang Betoy.
Tungod kay hasta ko giabot man gayud og kalibog, nakahunahuna hinuon ko sa paghimo’g pakisusi. Susihon ko gayud pag-ayo ang tinuod nga hinungdan, nganong si Betoy maoy giminyoan ni Daylin? Unta anaa may lain pang mga lalaki, sa among dapit.
Hinuon, duna say mga hiyas si Betoy nga angay'ng daygon. Sama pananglit sa iyang pagkamatinahuron ug pagkamatinabangon. Gani, dali ra kaayo nimo kining suguon. Talutaloan lang gani kini sa uban ug mosugot dayon. Dili pa gani mangayo og suhol. Basta ginagmay lang nga mga sugo.
Bahin usab kang Daylin, kaila ko kaayo siya. Kanunay man gud siyang mag-anhaan sa among balay kay amiga man kaayo sila ug ang akong maguwang nga babaye. Gawas pa, paryente man sab namo sila. Kay mag-agaw man ang among masigka amahan.
Sa akong nahibaw-an, nakatrato diay kini si Daylin ug taga dakbayan sa Sugbo. Nagtrabaho na gani kuno kini. Ug kanunay gani kunong mamisita ang maong lalaki diha sa balay nila ni Daylin. Pirme gani kuno kining makakuyog, kun mangaligo sila si Daylin sa dagat, ug hasta pa gani sa pagpanglamaw og mga butong.
Ug sa ilang mga lakaw ni Daylin ug sa iyang trato, kanunay usab nilang ikuyog si Betoy. Mao man god kini ilang sugosugoon. Ilabi na sa pagsaka og mga butong. Ug sa bisan unsa nalang nga mga ginagmay’ng bulohaton. Gani, makahigda man usahay si Betoy, sa ilang balay ni Daylin. Kay suod man lagi kaayo sila.
Apan miabot ang higayon nga nahibaw-an ni Daylin, nga minyo diay ang iyang natrato. Ug gikaguol kaayo kini niya. Ilabi, kay duna na ra ba siya’y namatngunan nga may kinabuhi na nga nagtubo sa iyang sabakan.
Tungod niini, buot nalang untang hunoson ni Daylin ang iyang kinabuhi. Dili man gud siya buot nga pakatawhon ang usa ka bata nga walay paga-ilhon nga amahan. Ikauwaw man kaayo niya kini. Apan maayo nalang gani kay nasanta siya ni Betoy, sa iya untang pagabuhaton. Naatol man sab gud nga diha si Betoy niadtong higayona. Ug si Betoy na gani ang mialam-alam kang Daylin. Aron lang nga dili na kini makahunahuna og dautan.
Ug mao lagi kadto. Sa paglabay sa pipila ka adlaw, gidungog nalang nga kaslon na sila si Betoy ug Daylin diha sa simbahang katoliko sa among lungsod. Ug ang kasal pagahimuon sa adlaw nga Sabado. Apan dili sa adlawan, kun dili sa panahon sa kagabhion.
Sa akong kaugalingon nakaingon ako. Nga husto kaayo si Daylin sa iyang hukom. Sa pakigminyo kang Betoy. Kay ang mahinungdanon gud alang kaniya, mao man ang masanag nga kaugmaon sa umaabot niyang anak. (Kataposan)