Ang Impiyerno ni Belen - 2

Gula 123

Bisan unsa ko ka daotan, gidawat lang gihapon ko sa akong mga ginikanan. Dili sila konsentidor sa akong daotang binuhatan. Igo lang silang nagtamod sa ilang responsibilidad isip akong mga ginikanan.

Kapin sa duha ka semana nga wala ko maggawas-gawas sa balay. Mora’g dili pa ko andam makig-atubang sa mga tawo sa among dapit nga nakaila nako. Gibati ko ang kaulaw.

Usa ka Domingo niana, nakahunahuna ko pagsimba. Nangumpisal ko sa pari sa akong kasal-anan. Gamhanan gyud ang Dios.

Kay sa paggawas nako sa simbahan, gibati ko man nga ingon sa miluag ug migaan ang akong dughan.

Usa ka adlaw niana, miadto ko sa Tagbilaran. Ako’y gisugo sa akong mga ginikanan pagpangompra sa mga produkto alang sa tindahan nga bag-o lang nilang gibuksan. Sari-sari store ra gud.

Human makapangompra sulod sa usa ka supermarket, gibati ko ang kagutom. Maong nakahukom kong mosulod sa usa ka fastfood outlet.

Sa akong pagsulod sa kan-anan, maoy unang nakadapit sa akong pagtagad ang mga kustomer nga nangaon nga nahimutang sa nasuok nga bahin sa kan-anan. Si Homer! Kauban niya ang iyang asawa ug mga anak!

Nahiuli na diay si Homer gikang nanarbaho sa gawas sa nasud. Ug labaw sa tanan, natibuok na pagbalik ang iyang pamilya.

Gibati ko ang kalipay alang ni Homer.

Wala lang tuyoa, nahapayanghag si Homer ug nagkatagbo ang among mga tinan-awan. Iya kong gipahiyoman. Mibalos ko pagpahiyom niya. Unya mitalikod ko ug migawas sa kan-anan.

Ingon sa kalit lang nawala ang akong kagutom. -- Kataposan