Mapiko lang kun huypon sa hangin

Walay puas ang pagpanubod sa singot ni Pialita, uban kang Portik, nga nangluhod atubangan sa altar ning dakong simbahan sa lungsod sa San Fernando, samtang gipahigayon ni Pa-dre Mateo Mondido, ang misa sa ilang kasal ning kasayo pa sa kabuntagon.

"Unsa goy nahitabo kanimo akong mahal nga Pialita, nga wa may hunong sa pagpanggawas ang kabugnaw sa imong singot?," ni Portik pa nga nangutana kang Pialita.

"Imbes hinuon ... mobati ka og dili tiaw nga kamaya, nga karong gabii ... human sa atong kasal, imo nang hitagamtaman ang talagsaong dumog nga kalami nga dili ika-pangagda?"

Wa lang kini tubaga ni Pialita, ang pangutana ni Portik. Kinsa bay dili kuyawan ... nga nadungog god ni si Portik, nga killer sa miagi niyang nangaanhing nga asawa, gumikan sa nahuptan niyang talagsaong armas sa iyang pagka-lalaki?

Kanunay man gud nga manumbaye sa iyang hunahuna, ang pasidaan ni Nanay niya Peran, nga taudtaod na usab nga nabiyuda, ni anhing Tatay niya Bartolo, diin kini nagkanayon:

"Ang nahitabo sa nangamatay nga tulo sa nangaanhing nga asawa ni Portik ... sama usab sa mahitabo kanimo Pialita!"

Nahiugnok sa makadiyot niadtong tungora si Pialita, sa nabati niyang pasidaan sa iyang inahan.

"Kay ngano man diay Nay Peran? Unsa man diay ang bugtong hinungdan nga nangamatay man kadtong tulo ka asawa ni Portik?," ni Pialita pa nga mabalak-on nga nagpakisayod.

"Basta kutob sa maasawa ni Portik ... milagro na kaayo nga dili mag-bleeding, hangtod nga mamatay!"

Nagpangurog si Pialita, nga misulod sa sibay. Unsaon pa man nga nahinayak na siya sa pagpamana ni Portik.

Kun magpabilin sad siya nga dalagang guwang, manimaho nalang siya og agup-op? Bahala na lang kun unsay iyang dangatan.

Apan naunsa bang hitaboa ... nga nanuktogaok na lang ang manok sa kaadlawon, wa man gayod siya makasinati nga gipalamian siya ni Portik?

Diriyot mataktak ang iyang kalimutaw, sa dihang dihay iyang nahikapan ... sa may ubos sa bilahan sa iyang bana nga mapiko lang kun huypon sa hangin? (Kataposan)