Nalangan nga kabuntagon

CEBU, Philippines - “Si Destiny mao ang matuod kong anak,” pasabot ni Mr. Galasi. “Anak ko siya sa una kong asawa nga namatay human niya ihimugso si Destiny.”

“Ug ikaw, Evan,” ni Mrs. Galasi pa, “akong anak sa una kong bana nga usa ka sundalo nga namatay sa pagpakiggubat sa mga rebelde sa Mindanao.”

“Mao kana ang matuod,” nagkanayon si Mr. Galasi. “Managsama na kaming biyudo nga nagminyo si Virginie. Gililong namo ang kamatuoran aron magdako kamo nga mag-ilhanay nga matuod nga managsuon. Apan tungod niining nahitabo ninyo, napugos kami pagbutyag sa kamatuoran.”

Wala tuyoa nga nagkatinutokay sila si Destiny ug Evan. Gibati ni Destiny ang kalipay ug kahinangop. Daw gusto niyang gakson si Evan tungod sa kalipay.

Ingon sa maglisod pagtuo sila si Destiny ug Evan sa kamatuoran nga ilang nasayran gikan kanila ni Mr. ug Mrs. Galasi. Dili diay sila tinuod nga managsuon? Wala gayod sila magdahom.

Apan sa hilom gikalipay kini ni Destiny. Dili diay angay nga mabalaka sila si Evan mahitungod sa nahitabo kanila. Dili diay eskandaloso sa ilang pamilya ang iyang pagmabdos tungod kay dili man diay matuod niyang igsuon ang lalaki nga maoy amahan sa bata nga iyang gisabak. -- Sumpayan pa