Sud sa announcers booth ni Max Alburido, sa DYKAON, adunay tiguwang nga pungkol ang tuong kamot ang kalit nga misapaw sa nag-unang linya sa mga tawo nga buot magpa-public service.
"Magpa-public service, unta ko, Sir." matud sa tiguwang pungkol. Nagluha-luha ang mga mata.
"Linya lang, Manong ... kay nauwahi ka man." Matud ni Max Alburido. Diha’y nagyawyaw sa mga magpa-public service, tiguwang naman ta kuno, wa may batasan, mosapaw'g kalit sa linya.
"Importante lang ta kaayo, Sir." pamugos sa tiguwang pungkol. Mibakho. Gitrapohan sa iyang sinina iyang luha ug nanikma. Daghang giluod sa mga buot magpa-public service. Dihay miingon "Paunha na lang na siya, uy... kaluod!"
"Bi... unsa man gyu’y problema nimo, Manong nga guol man gyud kaayo ka sa among tan-aw," matud ni Max Alburido. Dihay mikomedya.
"Namatyan tingalig iring!" matud sa usa ka lalaking maot og dagway, mibuliskad ang ngabil sa pagngisi.
"Gi-isnats man gud akong relo," matud sa tiguwang pungkol ngadto ni Max Alburido.
"Kinsa gani pangan nimo, Manong?" ni Max Alburido.
"Tawga lang ko’g Noy Tomas, Sir ... importante lang kaayo, ako tawo’y paunha pagpa-public service, Sir" pangliyupo ni Noy Tomas.
"Paunha nalang na, uy ... aron di ta malangay'g samot," matud sa Amerikano nga makahibawo diay mobisaya. Daghang nakaba-ik-ik. Nikatawa pog gamay si Noy Tomas.
"Na, hala ... panawagan na Noy Tomas!" matud ni Max Alburido, nga hapit na maaburido.
"Manawagan unta ko, kong si kinsa kadtong naka-isnats sa akong relo, palihug iuli intawon..." Wa makatiwas si Noy Tomas. Mibakho.
"U-unsay iuli Noy Tomas? ang relo?' ni Max Alburido.
"Iya nalang tong relo, Sir... basta iuli lang niya ang akong ..." Mibakho’g maayo si Noy Tomas. Nakahilak na lang pod nuon ang ubang humok og mga kasingkasing diha sa iyang luyo.
"Unsa man lagi, imong ipauli, manong?... lahosa kuno, aron makasabot tong isnatser," ni Max Alburido, nga naglibog ang ulo.
"Manawagan unta ko sa naka-isnats sa akong relo, imo na lang nang relo ... basta ... basta ... iuli lang intawon tong akong kamot nga naibot sa imong paglabnot sa akong relo de pulso...! Hu-hu-hu-hu-hu!" mityabaw'g maayo si Noy Tomas.
"Na! importante gyud tuod!" Naigking ug mikatawa na po’g maayo ang laki nga daut ug maot ang dagway. Mibuliskad na usab ang iyang mga ngabil. (Katapusan)