Nalangan nga kabuntagon

Gula 84

“P-pasayloa ko, Mom,” ni Destiny nga wala makapugong sa paghilak.

“Wa kay angay pangayoan og pasaylo, Anak,” sa inahan pa. “Nasayod na kami si Daddy mo sa hinungdan kun nganong buot kamong magpakamatay si Evan.”

“U-unsa?” Nakugang si Destiny.

“Nasusihan namo ang imong suicide note,” matud ni Mrs. Galasi. “Didto among nasayran nganong buot ninyong kutloon ang kaugalingon ninyong kinabuhi.”

Nahilom si Destiny. Gibati niya karon ang tumang kaulaw ngadto sa iyang inahan. Nasayod na diay kini sa kamatuoran. Lakip ang iyang daddy nasayod na usab sa tinagoan nila ni Evan.

Pagkamaka-uuwaw niining hitaboa, ni Destiny pa sa hilom. Mihakop na usab sa iyang hunahuna nga mas maayo unta’g namatay na lang gayod sila si Evan. Dili na mobati’g kaulaw sila si Evan bisan pag mabutyag ang ilang tinagoan kun patay na sila. Apan karon nga nabuhi sila, seguradong mahiagoman gayod nila ang dakong kaulawan.

Apan nganong ingon sa wala man masuko ang iyang mommy kaniya bisan nasayod na kini sa tinagoan nila ni Evan? Tungod kaha kay naa pa siya sa talandogon nga kahimtang hinungdan nga wala una kini magpakita og kasuko kaniya?” O nakadawat na kini sa iyang gidangatan? Sa nahitabo nila ni Evan? -- Sumpayan pa