Amg tigulang kong Valentino

Si Smith, usa ka Fil-Am, negro, tigulang nga negosyante ug biyudong way anak. Nagdako sa Hawaii ug moanhi kang Ela nga uyab niya sulod sa lima ka tuig sa internet. Maayo na kaayong mobinisaya.

"Sus, kun may lain lang kong uyab, di ko ni daginoton," matud ni Ela. Nagpaabot sa iyang valentino sa airport ang edaran nga dalaga.

"Helloo! Are you my dear, Ela?" ni Smith pa.

"Yes, ako ni. Ikaw ba si Smith?" Giseguro niya kay itom na kini, nag-amerikana pa ug itom mora na hinuon siya og anino gawas na lang sa bulawang ngipon nga nagpangidlap sa kasinaw.

"Moderetso ta sa hotel?

"No, no. Mangita lang ta'g balay nga kaabangan."

'Kakuripot sad aning tawhana,' iyang hunahuna, 'ambot sapian ba kaha ni, mopuyo man la'g ordinaryong balay.'

Nianang gabii, sa balay nga ilang nakuha, misiaw dayon ang kahidlaw ni Smith. Gikulbaan si Ela nga nasayud sa sunod nga eksena.

"Please, love, unya na lang na sa atong kasal," matud ni Ela nga nakabatyag nga may nahikapan si Smith.

Paglabay sa pila ka semana, "Oy, love, kanindot god sa atong mansiyon," nakatuaw si Ela human sa sekretong kasal nila.

"No worry, let's paint the town red tonight."

Pagka-gabii niana, "Ops, ayaw una kay maligo pa ko, tana nuon, kitang duha sa banyo."

"No, ikaw na lang, but please, pagdali."

Human niya'g kaligo, misukop dayon siya sa iyang bana nga nagbukot sa habol sa dihang may nahikapan siya. Mitimbakowas siya pagdali nga nagpaninggit sa kalisang.

"Nganong putol man na?" Apan kalit siyang giukoban sa halok hangtod nabatyagan niyang may mitidlom sa iyang kahiladman. "Nganong karon paman ni oy," ni Ela pa nga nahigam.

"Are you, okay?"

"I'm okay, pero naunsa man diay na nga naputol man?" ni Ela nga mitan-aw sa bilahan.

"Hain, kini? Naaksidente ko mao nga nagpataod ko og artipisyal nga tiil aron ko makalakaw."

Pila lang ka bulan, may sunog ug naapil ang mansiyon nila. Naguol si Ela, apan kalma lang si Smith.

"No worry, tukoron nato'g balik ang mansiyon."

Nahuman ang mansiyon nga mora'g palasyo ug nakadaginot pa sila og kaluha paglabay sa mga tuig. Usa ka gabii niana, "Ela, may ipakita ko nimo," ug gipindot ni Smith ang usa ka buton ug naabli ang bongbong.

"Kadaghan anang artipisyal nga tiil, ngano man na?"

Gikuha ni Smith ang usa, ug gihuslo ang usa ka parti.

"Oy! Kadaghang diamond niini."

"Dinhi nako tago-i ang mga diamond nga nakuha ko sa Afrika." (Kataposan)