Ang Impiyerno ni Belen - 2

Gula 101

Paglabay sa kapin sa usa ka semana, nakadawat ko’g pahibalo gikan kang Roger nga nakasakay na siya sa barko. Ang cargo vessel nga iyang gitrabahoan modunggo kausa matag bulan sa puwerto sa Subic didto sa Luzon.

Sa pagbalik ni Roger og panarbaho sa barko, wala na ko’y problema sa higayon nga gustong makigkita si Galen nako. Makahimo na ko sa pagpakigkita kaniya bisan unsang orasa. Nga mosangko gyud kanunay sa usa ka mabugnaw’ng lawak ug didto among tagayan sa wala’y pagkapuol ang matam-is nga dugos sa lawasnong kalipay.

Hangtod nga miabot ang panahon nga namugos si Galen nga makatultol sa akong gipuy-an sa Talisay. Panagsa na lang mi motsek-in. Mokalit lang og tungha si Galen sa balay kun bation na niya ang lawasnong panginahanglan.

Sa higayon nga modunggo ang barkong gitrabahoan ni Roger didto sa Subic, gusto niyang magkita kami. Mao nga duha ka adlaw sa dili pa modunggo ang barko, mobiyahe na ko paingon sa Subic.

Balewala alang ni Roger ang kadako sa gasto sa akong pagbiyahe gikan sa Cebu paingon sa Manila ug gikan sa Manila paingon sa Subic. Ang mahinungdanon alang niya mao nga magkakita mi ug magkauban bisan sa mubo lang nga panahon. -- Sumpayan pa